Google vien de revelar que tien modificáu l’algoritmu qu’usa pa xerarquizar les respuestes a les millones de consultes que se faen nel motor de busca diariamente. Y, esto, ¿qué quier dicir? Cuando dalguién quier saber cuálu ye l’incidente que dio empiezu a la Primer Guerra Mundial, o calaquier otra cosa, escueye les palabres clave que considera se relacionen col tema. Pa describir en términos cenciellos un prodesu dafecho complexu enl que puen influyir unes 200 variables, esto ye lo qu’ocurre al facer clic na lupa qu’activa la busca: Google analiza les palabres individualmente y amuesa una llista colos vínculos que considera más relevantes.

Pero agora, colos cambios qu’introduciera la compañía, les palabres se van procesar nel contextu de la oración, non aisllaes. Y, según Google, esto va apurrir resultaos enforma más exactos. El nuevu algoritmu bautizóse col nome d’Hummingbird, el colibrí.

Asina, si se fai una consulta alredor de bombones de chocolate y lo que se quier saber ye cuándo fue la primer vez que se ficieron, esa ye la información que se tendría d’obtener y non una receta pa preparalos.

Otru elementu bien importante nel cambiu anunciáu por Google ye la importancia de los teléfonos móviles nel desarrollu de los cambios. Ye por eso que la busca de voz, en cuenta de la tradicional que se fai nun ordenador o nuna tableta, optimizóse nel nuevu algoritmu.

Nesti contextu, la información que proporciona la función d’ubicación xeográfica que tienen los teléfonos intelixentes, optimiza los resultaos que pue dar Google. Si’l motor de busca s’usó nel móvil y se compartieron datos personales, como’l llugar nel que vive o la dirección del trabayu, la información pue ser más exacta. Asina, cuando la persona nagua por saber el nome de los meyores restoranes italianos, hai bien de posibilidaes de que les opciones apurríes pela busca tean na zona na que l’individuu se suel atopar.