Les condiciones del programa pactáu, sicasí, concreten el repartu por países d'un primer cupu de 66.000 places y aplacen definir el restu del compromisu d'acoyida, esto ye, 54.000 places, pa más palantre, a la espera de qu'un tercer Estáu miembru pida que lu ayuden con esti programa o se reasignen a inmigrantes llegaos a Italia y Grecia.

   L'acuerdu salió alantre tres un primer intentu fallíu la selmana pasada y magar el votu en contra de cuatro estaos miembros --Hungría, Rumanía, República Checa y Eslovaquia-- y l'astención de Finlandia, según informaron fontes diplomátiques.

   El repartu de la responsabilidá ente los estaos miembru inclúi cuotes d'acoyida inclusive pa los países que s'asitiaron claramente en contra d'esta iniciativa. "Naide tien derechu a nun aceptar (refuxaos) si la decisión s'adoptó", alvirtió al términu de la xunta'l ministru luxemburgués y mediador na negociación, Jean Asselborn.

   La propuesta inicial diseñada pola Comisión Europea plantegaba reasitiaba a 120.000 demandantes d'asilu procedentes d'Italia, Grecia y Hungría, pero la negativa del Gobiernu de Viktor Orbán a tar consideráu beneficiariu d'esti programa obligó a rediseñar la propuesta.

   Hungría pasó a tar consideráu país d'acoyida pa les persones con derechu a protección internacional, lo que va tornar nun sele amenorgamientu de les cuotes asignaes de primeres a cada Estáu miembru, cerca de 15.000 places nel casu d'España.

   Asina, establecióse un plan en dos fases que na primera va permitir reasitiar nos estaos miembros a un total de 66.000 refuxaos procedentes d'Italia y Grecia, los países más afectaos pola crisis migratoria.

ESPAÑA "TA YÁ EN CONDICIONES"

   El documentu del acuerdu, al que tuvo accesu Europa Press, atribúi a España la reubicación de 8.023 persones, 1.896 llegaes d'Italia y 6.127 de Grecia.

   El ministru d'Interior español, Jorge Fernández Díaz, indicó qu'España "ta en condiciones yá" de recibir a los primeros refuxaos, anque recordó que la puesta en marcha darréu de los centros de rexistru n'Italia y Grecia, pa identificar y tomar les buelgues de los inmigrantes, ye un requisitu previu indispensable pa qu'arranque la iniciativa europea de reubicación.

   "Confiamos en qu'esti acuerdu puea implementase lo antes posible, lo deseable sería que dende mañana tuviéramos en condiciones tolos estaos miembros", declaró.

   Amás, el ministru español negó qu'exista una solidaridá forzada" pa los estaos miembros que s'oponen a la iniciativa y consideró que nun son "reserves de fondu", sinón porque consideren otres alternatives pa tratar "el raigañu del problema", y non solo les consecuencies inmediates de la crisis de refuxaos.

   "Ye verdá que lo más urxente y prioritario ye acoyer a esos refuxaos, pero tamién ye verdá qu'hai que procurar que nun haya más refuxaos, porque son persones que fuxen de la guerra, non voluntariamente", acabó.

Foto: REUTERS