La Comisión de Cultura de FORO súmase al homenaxe a Nené Losada na Selmana de les Lletres

• Quier valorar asina el “legáu históricu” d’Asturies a “la realidá común y colectiva d’España”
• Marcos Vallaure: “Nené Losada amosó’l papel de la llingua asturiana como espaciu de llibertá y tolerancia”

La Comisión de Cultura de FORO quier sumase a la Selmana de les Lletres como homenaxe a tolos escritores que supieron tresmitinos el so amor pola llingua asturiana, y con él los valores d'una sociedá qu'aspira a construyir el so progresu y la so modernidá ensin romper cola nuesa íntima tradición: un legáu históricu que nos otorgó un llugar propiu dientro de la realidá común y colectiva que ye España. Nella asumimos la responsabilidá de la que, como asturianos, somos depositarios: caltener pa futures xeneraciones les llingües d'Asturies, llingües tamién d'España y, por ello, parte irrenunciable del nuesu patrimoniu común.

Marcos Vallaure: “Lloñe de ser una llingua en conflictu col idioma común español, l'asturianu foi y ye en tolos nuesos escritores un elementu integrador, un llugar d'alcuentru de los asturianos colos elementos que configuren la cultura material ya inmaterial d'Asturies: los nomes de los sos llugares, la música, les costumes de les sos xentes, la lliteratura. Seique'l meyor legáu recibíu d'Antón de Marrieguera, de Xosefa Xovellanos, de Caveda y Nava, del Padre Galo o de quien recibe'l nuesu merecíu homenaxe, Nené Losada, foi precisamente'l d'amosanos la llingua asturiana como un espaciu de llibertá y tolerancia (nunca un motivu d'enfrentamientu), pero tamién el de contribuyir, dende la so llibertá de creación artística, al so usu cultu, reclamando col testimoniu de la so obra'l prestixu social y la dignidá d'una llingua que nellos ye tamién idioma d'espresión culta y non solo llingua de comunicación doméstica”.