Cono aforu del teatru Toreno chen, l’alumnáu de terceiro ya cuarto de bail.le, percusión, gaita ya tambor de la Escuela de Música Tradicional desplegóu tódalas armas musicales pa encandilar a un públicu entregáu que siguía’l conciertu marcando’l ritmu cono cuerpu ya hasta tarareando los cantares disimuladamente.

Durante hora ya media houbo actuaciones diferentes del grupu de gaita ya tambor ya del alumnáu de cantu ya percusión qu’amás de cantar, bail.lóu las danzas del país, tando por supuesto ente el.las la Xota de Cangas ya’l Son d’Arriba. L’alumnáu de bail.le ya percusión foi l’encargáu d’empicipiar l’espectáculu con una representación emotiva del ramu qu’arrancóu conos primeiros aplausos de la nueite. El broche púxolu l’alumnáu de gaita ya tambor, que consiguíu poner al públicu en pía pa cantar “Asturias, patria querida”, al son de las gaitas ya tambores.

El conciertu de l’alumnáu de terceiro ya cuarto de la Escuela de Música Tradicional del Conceyu yá’l primeiru de los actos de la XI Semana Cultural, qu’inauguraba minutos antias del sou principiu l’alcalde de Cangas del Narcea, José Luis Fontaniella. L’Alcalde animóu a los asistentes a siguir “mirando ya ameimando la nuesa cultura” ya agradecíu’l l.labor desempeñáu pol Aria de Cultura na organización de la semana cultural; amás, reconocíu especialmente a las personas que fixenon posible que s’eichara a andar la exposición de vistimenta ya instrumentos de Cangas del Narcea.