La Orquesta de Cámara de Siero (OCAS) llegó esti sábadu 1 de marzu a Washington pa dar el so primer conciertu de la xira americana xunto al Coro de Voces Blanques del Nalón. Esti primer conciertu tuvo llugar na sé de la OAS, la Organización d’Estaos Americanos y algamó un enorme éxitu.

Nesti primer día, los miembros de dambes formaciones fueron recibíos ya invitaos a xintar nel so restorán Jaleo de la capital americana pol famosu cocineru mierense José Andrés. Na foto d’esti artículu vese a la flautista de la orquesta, la tamién mierense Sara Illana Arias, que s’alcuentra en Caracas trabayando nel Sistema d’Orquestes Venezolanu, xunto al citáu cocineru.

Tres de la xira griega del pasáu branu, la Orquesta de Cámara de Siero, dirixida por Manuel Paz, emprende esta nueva xira xunto al Coro de Voces Blanques del Nalón, que los va llevar depués de Washington a la ciudá de Nueva York, onde va dar varios conciertos. Dientro d’ellos, el cantador de tonada Fernando Valle Roso va interpretar una pieza de canción asturiana tradicional, acompañáu al pianu pola citada Sara Illana Arias.

Nestos momentos, la Orquesta de Cámara de Siero alcuéntrase entamando los preparativos pa una nueva xira nel branu que los va llevar de nuevo a Grecia –de manera principal a Creta- y a Chipre, tres del enorme éxitu collecháu na última xira. La flashmob realizada pola formación nel aeropuertu de Creta fue ún de los videos más vistos en YouTube el mes pasáu y recibiera nel mes d’avientu’l Premiu de la Crítica RPA al Meyor Videoclip del Añu, un premiu que venía a sumase al que tamién recibiera la propia orquesta como Meyor Grupu del Añu.