Ay, cielín… hoy la güela Balbina va confesavos una cosa: nunca fixera un roscón de Reyes. Sí, sí, como lo oyes. En casa siempre se compró, primero na panadería del barriu y depués, cuando too se puso más fino y más caro, pues industrial, que ye lo que había.
Pero esti añu, mira tú por dónde, díxome’l corazón que non.
Que los industriales saben a poco y los artesanos… ay, los artesanos tan tan ricos como caros, y una ye güela, pero tamién mira la peseta. Asina que pensé: “Balbina, ¿y si lo faes tú? ¿Qué vas perder? ¿Un güevu y un poco fariña?”
Y aquí me tienes, con el mandil puestu y tol cariño del mundu.
Ingredientes (pa un roscón hermosu, como Dios manda)
-
650 g de fariña de fuerza
-
250 ml de lleche templadina (nun la pongas caliente, eh)
-
25 g de llevedura fresca de panaderu
-
120 g de azúcar
-
120 g de mantequilla a temperatura ambiente
-
2 güevos
-
Ralladura d’una naranja y d’un limón
-
2 cucharadines d’agua de azahar (que ye lo que-y da’l alma)
-
1 pizquina de sal
-
1 güevu más pa pincelar
Pa decorar
-
Fruta escarchada (la de colores, que ye Reyes)
-
Almendra laminada
-
Azúcar humedecíu con unes gotines d’agua
(Y si quies meter la faba y el rey… metelos, que eso ye sagrao)
Elaboración (pasín a pasín, ensin correr, como facíen les güeles)
-
Desfái la llevedura na lleche templadina, con una cucharadina del azúcar. Déxalo reposar cinco minutos, hasta que espabile, como quien diz.
-
Nun cuencu grande pon la fariña, el restu del azúcar, la sal, la ralladura de cítricos y fai un güecu nel mediu.
Equí vas añadiendo los güevos, la lleche cola llevedura y l’agua de azahar. -
Amasa con ganes, cielín. Primero pegajoso, depués ya se va portando meyor. Cuando la masa tea más fina, añades la mantequilla poco a poco, ensin prisa.
-
Sigue amasando hasta que quede suave y elástica, que al tocala nun se pegue a los deos. Esto ye gimnasia gratis, que nunca vien mal.
-
Forma una bola, tapa con un paño y déxala levar nun sitiu templáu, una hora y media o dos, hasta que doble’l tamañu.
Nun tengas prisa, que les coses bones necesitan tiempu. -
Cuando tea lista, saca l’aire con cuidáu, forma’l roscón con un güecu grande nel centru (que luego crez) y coloca la faba y el rey, si ye’l casu.
-
Ponlu na bandeja, tapa otra vez y déxalo reposar media horina más.
-
Pincela col güevu batíu, decora con fruta, almendra y azúcar.
Mételo al fornu a 180 ºC, calor arriba y abaxo, unos 20–25 minutos, hasta que tea doradín y prestosu. -
Sácalo, déxalo templar… y míralo con orgullu, que esti roscón ye fechu con amor.
Y nada, cielinos míos, que nun ye tan difícil como parece, y el sabor… ay el sabor… eso nun lo da nenguna fábrica.
Esti ye’l primer roscón que fago na mio vida, pero nun va ser l’últimu, porque cuando la casa güel a naranja, mantequilla y Reyes, una siente que too paga la pena.
Facéilu con calma, con risa y con familia cerca, que de eso van estes fiestes.
Y si nun vos sale redondu del too… nun pasa nada, que lo importante ye compartilo.
Un besín grande de la güela Balbina,
que vos desea unos Reyes bien dulces y con munchu amor,
y agora voy sacar la foto, que diz la xente que me reconocen pola cai… ¡y yo encantada, fíu!
