Nes redes sociales del Conceyu, la web de la Estaya, la revista dixital de la Fundación Municipal de Cultura y la plataforma Playpresta

Dientro'l ciclu de Díes Especiales, un vidiu conducíu pola bióloga Ánxeles Rodríguez Tuñón, dará a conocer los secretos del ecosistema conformáu pol sistema dunar más grande d'Asturies.

La Estaya de la Llingua d'Avilés sigue'l ciclu col que se festexen cuatro de los nomaos Díes Especiales del añu. Si'l pasáu 8 de marzu festexó'l Día Internacional de la Muyer, pasáu mañana, xueves 22 d'abril ye'l turnu del DÍa Internacional de la Madre Tierra.

Fadrálo cola emisión d'un documental pa tolos públicos, dedicáu al Monumentu Natural de L'Espartal, ún de los espacios más importantes dende'l puntu de vista mediuambiental na redolada d'Avilés.

Podrá siguise de forma telemática nes redes sociales del Conceyu d'Avilés, la web de la Estaya de la Llingua llinguaviles.com, la revista dixital de la Fundación Municipal de Cultura avilescultura.com y la plataforma dixital de contenidu asturianu PlayPresta. Podrá descargase dende les 00:00 hores.

El Día Internacional de la Madre Tierra celébrase cada 22 d'Abril dende 1979. Con él, intenta concienciase sobre los problemes derivaos de la contaminación, la superpoblación y la especulación y la necesidá de protexer la biodiversidá. Trátase d'un día pa homenaxear al planeta Tierra, y reconocelu como llar y madre de la humanidá.

Nel vidiu, la bióloga Ánxeles Rodríguez Tuñón va enseñanos los secretos d'un espaciu natural emblemáticu de la redolada d'Avilés, l'ecosistema que conformen les dunes de L'Espartal, el más grande d'Asturies con 3 km de llargu, allugáu ente la canal d'entrada a la ría y el cantil de Pinos Altos, dando forma a les playes de Salinas y San Xuan.

Anguaño, mui deterioráu y amenorgáu por culpa  de toles actividaes industriales, portuaries y poles cases qu'hai, caltién un valor paisaxísticu y natural, y tamién con muncha flora y fauna, que vive nos sos cordones dunares. Ánxeles va esplicar cómo protexer unes dunes que cada día sufren por l'aición humana. 

Los día especiales de dempués van ser:

• 7 de mayu, Día de les Lletres Asturianes
• 5 de xunu, Día Mundial del Mediu Ambiente