Macando foi un conocíu hosteleru uvieín en que'l so establecimientu, anque modestu, podía comese el meyor mariscu de la ciudá. El secretu, a voces, que madrugaba, como tien que ser, pa dir a la rula de Llastres, por casu, a faese colos meyores llotes de centollos, ñocla, andarica, santiaguinos, esguila, colorada y gorda, llangosta y bugres del país y percebes. Y, como comprador, yera una potencia económica, porque tres él tenía como 'socios' de mercáu nada menos que al yá fináu Ramón (Marchica) y a otru pernomáu hosteleru, Marcelo (Goleta y Casa Conrado).
Aquéllos yeren tiempos nos que quien andaben nel mundu de los negocios, la industria o la gran empresa, frecuentaben los restoranes más nomaos y la demanda de crustáceos, cefalópodos y otres xoyes gastronómiques de la mar ástur yera diaria y abondosa. Díes de xente contento y discutinios al altu la lleva.
Pero Asturies nun yera fuñe, nesa dómina, sinón más bien grandona, y según los veceros de Macando, estudiantes con poco dineru o vecinos del barriu, beneficiábense a menor costu del potencial de compra del periféricu sidreru, otros munchos oficios, y non yá el de camareru, vivíen y espolletaben en redol al restorán, incluyendo a vendores de cupones y lloteríes, estanqueros, floristeríes, taxistes y otros productos y servicios.
Tuvi estos díes ocasión de recordar a Macando y el so tiempu, y éntrame cierta murnia al ver los restoranes y l'hostelería polo xeneral a media vela, coles docenes d'a ocho, los cien gramos de setenta, la copa de güisqui d'un dedín d'altu (pero dedu horizontal, tumbáu, qu'antes yera vertical, arguyosu), la tapa compartida y onde yá non se viende nin cupón.
Agora tou son culpes al pasáu, pero cuántu más redistributiva yera esa sociedá, qu'ésta qu'aspira a partir mierda y miseria ente la xente mientres los qu'entamaron el llíu, los mesmos déspotes de siempre, siguen comiendo lo mesmo..., namás qu'a puerta zarrada. ¿Saben qué? Yera meyor a puerta gayola.
