Nes principales ciudaes de Venezuela tan teniendo llugar estos díes bien de marches y movilizaciones de mozos como protesrta pola detención d’un grupu d’estudiantes el pasáu xueves 6 de febreru en Táchira, nuna descomada represión que dexó decenes de feríos de bales de goma. D’ehí que los xóvenes tuvieran n’estáu d’alerta y movilización tola última selmana, convocando pa güei una gran marcha.
Esta mesma mañana, venezolanos de toles partes del país apienzaron a movilizase nes casi, concentrándose nos principales puntos neurálxicos de les ciudaes y difundiendo imáxenes al traviés de les redes sociales.
De la otra parte, l’oficialismu organizó actos pa cellebrar el día de la Mocedá en Caracas y Victoria y hasta’l propiu presidente Maduro llanzó al traviés de twiter una hashtag pa nuclear a los militantes qu’apoyen el so gobiernu, pidiendo paz y traquilidá.
Ayeri, tres persones que protestaben en Mérida recibieron disparos per parte d’un comandu que pasó en moto. Ente los feríos hai un menor d’edá que recibió un disparu en pechu y ta n’estáu de coma por un colapsu pulmonar. Los activistes estudiantiles alvirtieron que demientres siga la represión van mantenese na cai.
La situación política, social y ecnómica en Venezuela ye crítica, depués d’un fuerte periodu inflacionariu y una manifiesta fuga de dólares y reserves. Nos supermercaos hai escasez de productos básicos, como papel hixénicu o dentríficu. A la vez, la restricción a les importaciones afectó a la prensa, con trabes burocrátiques llarguísimes p’adquirir papel de diariu, lo que llevó al cierre de varios medios.
Dejar un comentario
Acceder al formulario de comentarios de la comunidad