Abiertu'l plazu presentación de proyectos pa la Axenda Didáctica Escolar 2012-2013

Asturies.-La Conseyería d'Educación, Cultura y Deporte acaba de publicar nel BOPA de 12 de febreru de 2013 la convocatoria de participación na Axenda Didáctica Escolar 2012-2013, qu'anguaño algama la so cuarta edición.

El plazu de presentación de proyectos pa participar na mesma, per parte de les entidaes empresariales o asociatives interesaes, va dende'l 13 al 27 de febreru, dambos inclusive.

Depués, una Comisión designada pola Conseyera d'Educación, Cultura y Deporte va realizar la escueya de los proyectos que se va dar a conocer públicamente pa que los centros escolares formalicen la solicitú d'actividaes ente los proyectos escoyíos. L'axudicación d'actividaes a los centros tamién se va facer pública. Éstes han realizase dientro del cursu escolar 2012-2013.

Esta iniciativa de la Conseyería d'Educación, Cultura y Deporte, xestionada pola Dirección Xeneral de Política Llingüística, tien como propósitu'l sofitu del trabayu de los docentes nes actividaes d'usu y promoción del asturianu y, nel so ámbitu, del gallegu-asturianu; dando a conocer, al empar, a la Comunidá Educativa del Principáu d'Asturies la riqueza de la cultura asturiana qu'emplega l'asturianu o'l gallego-asturianu como forma d'espresión nes sos distintes manifestaciones tanto artístiques como pedagóxiques (música, lliteratura , teatru, etc.).

La Axenda Didáctica Escolar, na so pasada edición, incluyó un total de 53 actividaes: 25 dirixíes a los centros d'Educación Primaria; y 28 a los de Secundaria y Bachilleratu. Los colexos ya institutos destinatarios d'esta ufierta fueron un total de 208 centros.

L’aumentu, pasu ente pasu, de centros educativos y entidaes participantes nesta iniciativa de la Conseyería d'Educación, Cultura y Deporte, aconseyó que pa esta cuarta edición de la Axenda Didáctica Escolar 2012-2013, y nes socesives convocatories, s’estableciera una normativa qu'afitara plazos, forma y requisitos de participación pa caúna de les partes interesaes; d'una parte les entidaes empresariales o asociatives y d'otra, los centros educativos, públicos o concertaos, d'Educación Primaria, Secundaria o Bachilleratu nos que s'imparta l'asignatura de llingua asturiana o de gallegu-asturianu.

Pa más información consultar : http://www.politicallinguistica.org

                                               http://www.educastur.pricast.es