Londres (E.P.).-Polo menos 89 persones morrieron esti martes nel atentáu con coche bomba rexistráu en mercáu llenu de persones na provincia de Paktika, nel este d'Afganistán, según informó a la BBC un voceru del Ministeriu de Defensa afganu, el xeneral Zahir Azimi.

   Les fontes consultaes aseguraron que l'autor del atentáu conducía un vehículu touterrén y fizo españar la carga esplosiva cuando s'alcontraba nun mercáu atestáu de xente nel distritu d'Orgun. Según l'axencia de noticies afgana Khaama, l'ataque dexó más de 80 persones firíes de consideración y foi obra d'un terrorista suicida.

   Nel momentu del españíu, el mercáu alcontrábase llenu de persones que taben faciendo les sos compres. La provincia de Paktika alcuéntrase nel estremu oriental d'Afganistán, xunto cola frontera con Pakistán. De momentu, nengún grupu terrorista reivindicó l'autoría d'esti ataque.

   El distritu d'Orgun ye ún de los más estables de Paktika, anque ellí escuéndense milicianos de la rede terrorista Haqqani. Un voceru del Ministeriu de Defensa afganu confirmó que los militares retiraron 40 cadabres del llugar del atentáu.

   "Los nuesos soldaos tán tovía recuperando cadabres. Casi toles tiendes tán estrozaes", aseguró'l xeneral Azimi. Dellos testigos aseguraron que vieron a axentes de la Policía escorriendo al supuestu autor del atentáu terrorista primero qu'entrara nel mercáu y españara'l so vehículu.