Les campanaes n’Asturies repartiéronse ente Anne Igartiburu y Sonia Fidalgo

La prensa xeneralista española lleva estos díes resaltando la cayida d’espectadores de La1, el canal públicu, frente a l’ascensu de Telecinco y Antena3. Señalando, igualmente, que la rede de cadenes autonómiques compite n’audiencia ditectamente con La1: la cuota xeneral de pantalla de La1 fue del 10,2, demientres les autonómiques algamaron un 8,7. Les dos grandes cadenes privaes, con un 13,5 y un 13,4, respectivamente, tampoco s’allonxen tanto de los datos de La1 y les autonómiques.

Un datu siempre relevante ye’l pasu del añu nel momentu de les campanaes. A nivel español, l’audiencia de La1 barre al restu de cadenes privaes. Con too y mantenese nunos datos más qu’aceptables el conxuntu de les autonómiques. En concreto, nel casu d’Asturies, l’apuesta del ente públicu RTPA pa la Nueche Vieya, coles campananes y l’Especial Añu Nuevu, mantuvo’l pulsu a les tres cadenes con un programación basada nes grandes estrelles de la tonada asturiana y actuaciones como les de los neños del grupu Filandón, el grupu que repartió na llotería de Navidá más d’un millón y mediu d’euros ente los sos amigos y allegaos.

Nel momentu exactu de cruzar l’añu, Asturies tenía’l corazón partíu ente l’apuesta de siempre de la Puerta’l Sol de Madrid xunto a Anne Igartiburu, acompañada polos cocineros estrella de la cadena estatal, y el reló del Ayuntamientu d’Avilés xunto a Sonia Fidalgo y los componentes de La Cirigüeña. Nesti momentu la cayida d’audiencia de les televisiones privaes, Telecinco y Antena 3, ye espectacular, reduciéndose al nivel testimonial la presencia de La Sexta, Cuatro y demás.

La cadena pública asturiana, RTPA, vuelve a triunfar nesta nueche del pasu del añu con una apuesta minimalista, sobre l’escenariu del teatru de la Llaboral y acompañaos por públicu de Sariegu y Mieres. Pero, más que nada, vence n’imaxinación al presentar, frente a los grandes presupuestos de los magacines de les otres grandes cadenes, el proyectu de recibir l’añu apostando pola música propia, el nuestru propiu humor y la nuestra propia forma de falar.

Sonia Fidalgo y La Cirigüeña dieron, nesti sentíu, la campanada, amás de les campanaes.