Homenaxes a la cultura tradicional nel Festival d’AICA en L.luarca

L.luarca.- Esti domingu, 6 d’ochobre, va llevase al acabu nel Auditoriu del Conservatoriu de Valdés, na villa de L.luarca, el XXIV Festival d’AICA (Asociación d’Intérpretes de la Canción Asturiana). Esti alcuentru añal concentra a un importante númberu d’aficionaos, especialistes y profesionales de la canción asturiana, alredor del homenaxe a veteranos rellacionaos cola música y la cultura asturiana.

La primera de les homenaxeaes ye Obdulia Braña, nacida en 1913 nel propiu conceyu de Valdés, vaqueira de nación. Tocó-y vivir nos tiempos de la República y conocer los años duros posteriores a la guerra civil. Nos años 60 marchó a trabayar a Madrid y, de la que vuelve, nos años 80, conviértese nuna collaboradora habitual de los grupos d’investigación folclórica: como panderetera, como tocadora de castañuelas, como gran conocedora de tolos qu’arrodia’l folclor y la vida de los vaqueiros.

Tamién d’esti conceyu de Valdés ye la segunda de les homenaxeaes, Carmen Martínez, Carminina la Careca, nacida equí en L.luarca, maestra en bien de pueblos y profesora del institutu Carmen y Severo Ochoa que ta equí al llau. Fue discípula de Rogelia Gayo, la gran referencia del folclor d’esta comarca, y dende bien moza tuvo al frente de bien de grupos folclóricos de la zona. Dende l’añu 2000 ye la presidenta de l’Asociación d’Amigos del Festival Vaqueiru y de la Vaqueirada y nel añu 2008 recibió la Medalla de Plata del Principáu d’Asturies y la Medalla d’Honor del Ayuntamientu de Valdés.

L’últimu de los homenaxeaos ye un gaiteru, Guillermo Castro, nacíu na braña de L.lagu, en Trevías, y que comenzó a tocar l’instrumentu a la temprana edá de los 12 años, siguiendo l’exemplu y el maxisteriu de los pocos gaiteros qu’había pela zona. Fue ún de los fundadores de la famosísima, per estes tierres valdesanes, Banda de Gaitas Aires de Valdés: una cuartetu integráu por dos gaiteros, un tamboriteiru y un bombu. Dende entón percorrieron tola nuestra xeografía, con un repertoriu integráu por pieces de tol occidente y centru d’Asturies. Y siendo unos habituales de les fiestes de San Timotéu.

Nel apartáu de cantares del Festival intervinieron una ventena de cantadores, gaiteros y monologuistes, nun programa grabáu por Sones y que va ser emitíu’l domingu que vien, 13 d’cohobre, per TPA.