Del Asociacionismu asturianu como una de les belles artes

Estatutu Xeneral del Asociacionismu Asturianu:

TÍTILU PRIMERU: Del carácter de l’asociación.

Artículu primeru: Toa asociación asturiana naz con el propósitu de dividise en dos.

Artículu segundu: Esta nueva asociación asturiana surde col propósitu de nun tar d’alcuerdu cola anterior y a la vez de dividise tamién en dos.

Artículu terceru: Ser asturianu significa nun tar d’alcuerdu colo que propugna la so propia asociación.

Artículu cuartu: Dos asturianos lleguen a un alcuerdu cuando tan d’alcuerdu en nun tar d’alcuerdu.

Artículu quintu: Dos asturianos son suficientes pa formar una asociación asturiana a la qu’aplicar l’artículu primeru.

TÍTULU SEGUNDU: Del ámbitu de l’asociación y de los sos miembros.

Artículu sestu: Toa asociación asturiana ye universal pol simple fechu de ser asturiana.

Artículu séptimu: Pol simple fechu de ser universal nun necesita que nengún de los sos miembros sea asturianu.

Artículu octavu: De nun ser asturianu y querer selo ye bastante con facer como los asturianos y nun tar d’alcuerdu con dalgo o falar mal d’Asturies en xeneral.

Artículu novenu: De nun ser asturianu y nun querer selo nun lo digas o cuerres el riesgu de que te nomen directivu d’una asociación asturiana.

Artículu décimu: Si nun yes asturianu y nun quies selo y amás yes universal, yes más asturianu que naide.

TÍTULU TERCERU: De les perres.

Artículu oncenu: Nun va ser por problema de perres que faigamos o non una asociación asturiana.

Artículu docenu: De toles formes, pa eso ta l’alministración, pa pidí-yosles.

Artículu trecenu: De toles formes, pa eso ta l’alministración, pa nun concedeles a nun ser que nun vea un motivu gastronómicu claro nos fines de l’asociación.

Artículu catorcenu: Nun puede esistir una partida económica nuna asociación asturiana que nun recueya un apartáu gastronómicu.

Artículu quincenu: Les copes y los farias del apartáu gastronómicu cuerren a cargu de dicha partida.

TÍTULU CUARTU: De los fines de l’asociación.

Artículu selcenu: Una asociación asturiana nun necesita fines.

Artículu septicenu: De tenelos nun puen tar claros.

Artículu octicenu: De querer aclaralos nun se va tar d’alcuerdu.

Artículu nonacenu: De nun tar d’alcuerdu surden les escisiones.

Artículu ventenu: En casu d’escisión los miembros escindidos pasen a formar parte d’otra asociación a la qu’aplicar l’artículu primeru.

TÍTULU FINAL: De la disolución de l’asociación.

Artículu ventiunu: Una asociación nun desaparez hasta nun morrer l’últimu de los sos miembros, colo que, como asturianu, dexará de pertenecer a l’asocación de los vivos por francu desalcuerdu cola vida mesma pa pertenecer a la de los muertos onde tá por ver lo que sucederá.

Espídese esti borrador d’estatutu d’asociacionismu asturianu a 6 d’avientu de 2006, pa que nun se diga que toi tol día folgando, que siempre se me dio más bien que nada, y pa que cualquiera que nun tea d’alcuerdu comigo sepa perfectamente por qué y que sepa que podemos formar una asociación pa lo que nos vendrá bien un borrador d’estatutos como estos.