La formación va contar cola collaboración d’Anabel Santiago, Xosé Nel Espósito y Pandereteres de Fitoria pa interpretar los temes del discu «10 años nel camín»

Oviedo- La Banda Gaites Camín de Fierro va dar el domingu 30 de setiembre, a les 19,30 hores, nel Teatru Filarmónica d'Uviéu, un conciertu pa presentar el discu 10 años nel camín. La banda va festexar la so primer década d’existencia con un espectáculu onde van collaborar la cantadora Anabel Santiago, l’acurdionista del grupu folk Xosé Nel Expósito (Felpeyu) y el grupu Pandereteres de Fitoria. La entrada al teatru va ser de baldre hasta enllenar l’aforu.

10 años nel camín ye un discu col que la Banda Gaites Camín de Fierro quier enseñar el trabayu diariu como banda de gaites «n'estáu puru». Por esti motivu, los más de los temes tán interpretaos pola formación habitual de gaites, caxes, timbales y bombu, cola qu'aspiren a esplotar tolos recursos espresivos que tán al so algame. Depués d'una década d'andadura, son conscientes de lo difícil que ye innovar nel mundu de la gaita asturiana, sicasí, esta dificultá nun fai qu’arrenuncien a intentar crear un estilu propiu.

«Como nun facemos diez años nin grabamos un discu tolos díes, fomos quién a que nos acompañaren nesta aventura unos músicos y artistes de luxu. Con ellos esperimentemos otros  rexistros non tan habituales pa nós y, d'esta manera, un poco menos de la metá del discu ta dedicáu a versionar tanto temes propios de gaita esportaos a otros estilos como temes d'otros estilos importaos a la gaita», espliquen dende la formación.

La banda
La Banda Gaites Camín de Fierro naz nel añu 2002 mui de la mano de la Escuela de Música Tradicional de la Mancomunidá de los Valles del Osu –qu'abarca los conceyos de Santu Adrianu, Proaza y Teberga–, de la que salieron los más de los componentes de la formación.

Garra'l nome de la vía férrea construída a mediaos del sieglu XIX pa tresportar el carbón procedente de les mines de Teberga y Proaza hasta Trubia, el vieyu camín de fierro güei tresformáu na Sienda del Osu, una de les siendes verdes más transitaes d'Asturies.
Nestos diez años d'andadura, la formación foi evolucionando de contino y en tolos aspectos; de les primeres actuaciones nos Valles, vistíos de cai, pasó a una uniformidá con traxe tradicional onde los colores protagonistes, el negru, el verde y l'encarnáu son una seña d'identidá tamién presente nos instrumentos. Nel apartáu musical, el repertoriu de pieces tradicionales asturianes pasó a compartir espaciu vital con otres procedentes de Bretaña, pieces de bandina y hasta versiones de clásicos del rock, como'l famosu «Local hero» que, nel so momentu, fixera popular Dire Straits.

La evolución de Camín de Fierro dexóse sentir tamién nos escenarios que foi percorriendo nesti tiempu: de les fiestes de los tres conceyos que la vieron nacer y onde ye vezu atopalos, pasóse nos últimos años a festivales internacionales como’l Festival de la Danse Bretonne et de la Saint Loup, celebráu na localidá bretona de Guingamp, o'l Festival Intercultural de Confolens (Francia), onde la banda tuvo l'honor de compartir escenariu col gaiteru gallegu Carlos Núñez. Los miembros foron cambiando dende los primeros años y les coses de la vida fixeron qu'unos colaren y otros llegaren ensin que por eso se perdiera la esencia de la banda, porque toos, los vieyos y los actuales, son parte d'esti percorríu que yá lleva andada una década.

La constancia, el compromisu, la gana, la ilusión y l'empeñu son señes d'identidá d'una banda moza que ve en 10 años nel camín la plasmación del trabayu diariu, d'alcordances, anécdotes, vivencies, hores d'ensayu y afán por facer de la música tradicional una manera de vida. Esti discu ye una etapa más, non una meta, porque esto nun acaba equí, nun apara; porque, mentes haya Camín, va haber música p'acompañalu.