Ay, cielín… güei nun vos traigo receta, non. Güei vengo a contavos el menú que voy facer pa Nochevieya, que nun ye poca cosa. Que vienen los mios tres fíos, cada unu col so pareya, y los nueve nietinos, que comen como si nun hubiera mañana. Asina que aquí nun se improvisa nada: esto ye menú de boda… pero con frío, sidra y villancicos.

Agárrate, que empiezo:

Pa entamar, los entremeses (que esto ye lo primero que cae)

Porque na mio casa, si nun hai entremeses, paez que falta media cena.

– Xamón ibéricu del güenu, cortáu finín, finín, que se transparenta.
– Tabla de quesos asturianos: Cabrales pa los valientes, Afuega’l pitu, Gamonéu… y unu suave pa los neños, que tampoco ye cuestión de asustalos.
– Langostinos cocíos y a la plancha, que siempre vuelen primero.
– Bollinos preñaos, pequeñinos, que vuelen como les palomes.
– Pastelín de cabracho, con mayonesa suave y pan tostáu.

Esto ye pa ir picando… que picando, picando, ya casi cenas, pero nun, que esto acaba d’empezar.

El pescáu (que en Nochevieya nun se perdona)

– Pixín al fornu, con patatina panadera, cebollina y un chorru de vinu blancu.
Tien que quedar xugosu, eh, que si se seca ya me miren raro.

– Almejes a la marinera, pa que se moje pan y se calle tol mundu un momentín.

La carne (porque somos españoles y bien comíos)

Aquí ya saco les castañes del fueu:

– Corderu asáu despacio, dende pela mañana, con ajín, romeru y munchu mimu.
– Carrilleres guisaes al vinu tinto, que se desfagan col tenedor, que esto ye gloria bendita.
– Ensalada templada pa disimular, que siempre hai quien diz “yo solo pruebo un poco”.

El descansu… que nun descansa nadie

– Tabla de quesos otra vez, porque siempre queda güeca.
– Compota de mazana casera, que ayuda a baxar lo d’antes… o eso digo yo.

Los postres (aquí ya ye pecado)

– Turrones de tola vida, del duro y del blando.
– Polvorones y mantecados, que deixen el suelu como si nevara.
– Brazu de xitana caseru (que yo sigo diciéndo-y asina, con tol respetu).
– Casadielles, poques… pero bien feches.
– Y uvas, claro, que les campanaes nun se perdonen.

Y pa brindar…

– Sidra, como Dios manda.
– Cava pa les doce.
– Y un chupitín pa los mayores, que la vida tamién ye pa celebrala.

Y asina, cielinos míos, voy pasar tol día ente la cocina y el fregaderu, pero con gustu, que cuando la casa ta llena y los neños rín, nun pesa nada.

Dende esta cocina mía, con olor a fornu y a Navidad,
quiero deseyavos a toos los llectores d’Asturias Mundial unes Navidaes bien felices, con salú, con calorín y con xente a la vera.

Y nun vos preocupeis…
l’añu que vien sigo equí, dando guerra,
cocinando como una abuela asturiana de les de verdá.

Un besín grande,
la vuestra Balbina