Depués de facese un añu dende qu’ADIF (xestora de la infraestructura ferroviaria) y RENFE (operadora de la rede de ferrocarril) empezaren a usar la toponimia oficial d’Asturies, la Xunta pola Defensa de la Llingua Asturiana (XDLA) pide a dambes entidaes un usu más rigorosu y integral, con atención especial a les redes sociales, páxines webs y aplicaciones móviles.
N’avientu del 2020 la XDLA presentó l’Informe sobre l’incumplimientu de la toponimia oficial na rede de ferrocarril d’Asturies. En febreru del 2021, tuvimos la oportunidá de presentá-ylu al director xeneral de Política Llingüística, Antón García, que mostró interés nél y comprometióse a trabayar col Ministeriu de Tresportes pa que se respetare lo más rápido posible la toponimia oficial.
Como resultáu d’esi procesu, empezaron a vese los topónimos oficiales nes pantalles informatives de munches estaciones de la rede y tamién nos cartelos esquemáticos d’horarios n’apeaderos y estaciones. Sicasí, esti avance nun ta presente en toles instalaciones: por exemplu, nes estaciones d’Uviéu y Xixón les pantalles de RENFE nun respeten la toponimia oficial y les de FEVE, sí. Tampoco detectemos tovía que s’use nes pantalles y avisos sonoros dientro de los trenes.
Un campu con muncha difusión y al que tovía nun llegó la normalización toponímica son les aplicaciones móviles oficiales de les dos compañíes (ADIF y Renfe Cercanías), les páxines webs (nel casu de les Cercaníes Renfe nun hai presencia nenguna de la toponimia oficial; nel casu de FEVE, sí apaez nel buscador d’estaciones pero de manera incorrecta porque figura a continuación de la forma que yá nun ye oficial) y les redes sociales.
El papel de la Viceconseyería d’Infraestructures
La Viceconseyería d’Infraestructures, Movilidá y Territoriu, dependiente de la Conseyería de Mediu Rural y Cohesión Territorial, xestiona’l Consorciu de Tresportes d’Asturies (CTA), entidá que manexa cientos de topónimos na so actividá diaria en vehículos, anuncios, señales, horarios, web, etc. Sicasí, depués de cuasi venti años de la oficialización de los primeros topónimos, el CTA sigue incumpliendo la llegalidá toponímica. Cuando na señalización de carreteres de titularidá autonómica se tán respetando les denominaciones oficiales, resulta inesplicable esi desdexamientu por parte de los responsables políticos. Ye fundamental el papel de normalización social que xuega una entidá que xestiona la movilidá de cientos de miles de persones usuaries. El Gobiernu asturianu, si de verdá quier demostrar el so compromisu cola recuperación toponímica, tendría que dase cuenta de la importancia que la CTA tien nesti aspectu. Ye una de les munches coses que’l Gobiernu d’Adrián Barbón podía tener feches yá nesta llexislatura. Nun ye cuestión de consensos nin d’amabilidaes. Trátase de cumplir cola llegalidá.
