Guei too lo que necesitamos saber atopámoslo en Gloogle. Cómo pintar la casa o facer un bizcochu, traelo per bien explicao en internet. Pero lo que nun aparez, ye como pescar truches a mano.

Yo voy a contáboslo a vosotros por si atopais un ríu con truches (en piscifactoría nun val), y vos da el arrebatu de facelo. Anque ya los ríos tan escosos.

Lo primero hay que dir río arriba pol agua pa que les truches tiren tamién p´alla. Estes van a escondese  baxo les piedrones,  entos lo primero que hay que facer ye mirar cuantes fures tien el escondite. Si tien dos, por una métese la mano y tapes la salida. Si tien mas , hay que llamar a otru pa que te ayude.

Hay vegaes que cuando tas escarbando baxo la piedra, puees sacar algo más que truches.Pue ser un sapu, que queda atontau y nun fai na. O una culiebra que enróscasete na mano, pero que nun  te pica porque pa nadar dexen la bolsa´l venenu fuera´l agua. Toos estos bichos tan nidios, asina que nun sabes lo que topes hasta que los saques.

Si hay suerte y ye una trucha, gárresla per la boca o les hagalles bien fuerte pa que nun escape y clávesla en un gabitu que ya pañaste de unes rames.

En una tardi podíen coyese entre venti o venticinco truches, siempre vixilando que nun viniere el guardaríos y hubiere que tirar la pesca al ríu.

En casa, la paisana cocinábales  per la selmana de toles maneres. Frites, en empaná, guisaes…

Una buena fartura pa unos cuantos dies.

Bono collacios, a ver cuantes garráis vosotros, pero cuidavos de los civiles o lo que ye peor d´un osu esfamiau.