Acaba estrenase’l llargumetraxe documental “ReMine: el último movimiento obrero”. de Marcos Martínez, a partir de les güelgues de va dos años na minería asturiana, que llevó al encierru en dalgún pozu y a la organización d’una marcha andando a Madrid.
Un película épica sobre la memoria de la llucha de los trabayadores mineros asturianos, que concluye con una llegada heroica a Madrid. Too ello, visto agora, dos años depués, cuando se sabe pa lo poco que sirvió aquella movilización, cuando’l desprestixu sobrevuela les organizaciopnes sindicales en xeneral y cuando, n’Asturies, acaba saltar esti mes pasáu a los medios de comunicación l’escandalu de José Ángel Villa, máximu dirixente durante décades del sindicatu SOMA y poder na solombra de los gobiernos políticos del Principáu d’Asturies.
Una película asina, qu’a pesar de la épica lleva continuamente a la tristeza, a la desesperación, al abandonu, al abatimientu… necesita d’una banda sonora que percurre diez momentos. Exactamente diez. La verdadera banda sonora del film son los silencios, los ruíos d’ambiente y les conversaciones de la xente.
Por eso, ente ellos, destaquen estos 10 momentos musicales, la banda sonora d’estos tiempos de crisis vistos dende Asturies:
01 “Carmina”, de Víctor Manuel. Na sala baños del pozu, cantada por un mineru de la que se ducha.
02 “Viva la xente minera”, por Xuacu’l de Sama. La magnífica versión de Xuacu’l de Sama, un himnu grande, pa xente grande.
03 “Santa Bárbara”, pol Coro Mineru de Turón. Una melodía que va ser el filu conductor del documental, fondamente triste.
04 “Asturias” d’Isaac Albemiz, pola Orquesta de Cámara Ensemble Ars Mundi. Tremenda versión dirixida por Yuri Nasushkin y grabada nel Auditoriu de Mieres.
05 “Santa Bárbara”, cantada por muyeres y continuáu por una bandina música. Cada vez más triste, cada vez más doliente.
06 “La romería”, de Víctor Manuel. Esta vez cantada por él, sonando al fondo, per un altavoz.
07 “A la madre del mineru” de Diamantina Rodríguez, por Anabel Santiago. Versión en directo, en plena marcha a Madrid, nun descansu nel camín.
08 “Santa Bárbara”, por Berto Varillas y acompañamientu de coro. Por fin una versión heroica, en tonu mayor: como tendría de cantase siempre esti cantar.
09 “Compañeru, dame tira”, por Nuberu (Chus Pedro), un himnu de los de siempre, pa cuando seya necesariu.
10 “Agora, non”, por Xel Pereda. Pa llegar al final, colos créditos, dafechamente abatíos.
La película estrénase esta selmana nos cines. Un documental perfectu pa reconocenos a nosotros mesmos. A 80 años d’una revolución d’Asturies de la que nadie s’alcuerda y nadie conmemora. A 1 mes de la otra revolución d’ochobre de la que tovía nun llevantó cabeza’l sindicalismu mineru asturianu.
