Esti fin de selmana por fin el tiempu dio nos un respiru. Dempués de  tanta “cicloxénesis esplosiva”, que debe ser un nome importáu porque yo siempre oyera pa estos fenómenos atmosféricos, falar de temporales, galernes,
tormentes o vendavales.

El casu ye que fuime pal monte a disfrutar de la xornada. Caleyando  per ellí, dime cuenta que la primavera ta llegando. Ye per guapo ver y  sentir como la naturaleza entama a remanecer del fríu iviernu.

Les prímules, como'l so nome indica son les primeres en floriar y  anunciar l´aniciu del bon tiempu. Les cotolles, onde tan mas  resguardaes y da-yos meyor el sol, viense enllenes de florines  marielles. Los lloreos cuayaos de brotinos, entamando floriar pa  llucir el Día Ramos.

Los carbayos, humeros, castaños y ablanos empecipien a espolletar peles rames.

Pero nun solo se nota la venida de la primavera na vexetación, tamién los animales despierten .

Les fontes y regatos, enantes xelaos agora tan cuallaos de cucharones.

Los raitanes, glayos y verderinos, sentíen-se pente los árboles, acasu entamando a arreglar los ñeros pa la próxima guaria.

Y nos, probes seres humanos, fartucos de tar metíos en casa a la vera  la calefacción, tamién tamos céleres a salir y esparder un pocu, secando a los rayinos de Lorenzo, estirando los músculos y sintiendo l'airín  entovía frescu na cara.

¡Feliz bon tiempu a toos y que nos dure







.