Un videu publicáu esti miércoles pola Policía de Nueva Jersey muestra a dos policíes de la población de Bridgeton disparando hasta en nueve veces a un home negru que viaxaba nun coche al que los axentes dieren l'altu. El fechu tuvo llugar el pasáu 30 d'avientu pero los sos detalles nun s'asoleyaron hasta güei.

   Les imaxes, grabaes pola cámara instalada nel coche patrulla, muestren al oficial Braheme Days pidiendo a los ocupantes del vehículu que llevanten les manes. Cuando paez qu'éstos dispónense a salir del vehículu siguiendo les ordes del axente, Days dispara a Jerome Reid, que viaxaba nel asientu del copilotu y que finó nel actu.

   El conductor salió del coche xustu dempués y esposáronlu nel suelu los axentes de Policía, xusto cuando los refuerzos policiales facíen actu de presencia nel llugar del socesu, tal como pue observase nes imaxes, publicaes pola cadena de televisión estaounidense CBS. Los axentes aleguen que los sospechosos teníen una arma na guantera.

   Los dos oficiales de la Policía implicaos nel sucesu: Days, que ye afroamericanu, y el so compañeru, Roger Worley, que ye blancu, acoyéronse a una baxa temporal. El videu tamién se compartió nel portal de YouTube (https://www.youtube.com/watch?v=ys0OzmH_EPg).

   Dambos ocupantes del coche yeren de raza negra, lo que podría reabrir l'alderique sobre la brutalidá policial contra ciudadanos afroamericanos, tres los casos de Michael Brown y Eric Garner, finaos nos últimos meses.