LES XANES

Figura: Son seres femeninos d´estructura corpórea humana. Tienen dos tribes de visualizaciones. Nuna, aquella cola qu´habitualmente les representen los dibuxantes y se les supón na iconografía urbana contemporánea, son una especie de moces nórdiques, perguapes, rubies y de llarga cabellera; en dalgunes iconografíes llevaríen túniques de plata o blanques. Esta visualización ta xunida, polo xeneral, a les xanes poseedores de tesoros y a les xanes encantaes. En cambiu, nes visualizaciones de les xanes que roben ñeños y de les qu´entren nes cases a morder o robar, los informantes suelen imaxinales pequeñines, comu nianines, roínes y de color mui prietu, como los sos fíos, los xaninos (1), que son tamién mui roínos y negros. Escases representaciones supóneneles pequeñines (1bis).

Allugamientu: Viven en fontes y cueves. Temporalmente pueden vivir nes cases colos humanos.

Atributos: Les coses coles que trabayen (rueques, duviellos, tisories, etc.) o xueguen (bolos) son d'oru o plata. Ente los sos atributos más frecuentes tán les tisories y los cadexos d'oru (2). A vegaes tienen rebaños de vaques máxiques y pitos y pitines d´oru (atributos estos, frecuentes de les encantaes de la nueche de San Xuan (2bis).

Acciones: Les xanes camuden de xemes en cuandu los sos fíos (los xaninos) polos ayenos. Otres abandonen a los sos fíos, pero la so llamada faeles tornar al so cuidáu (2ter).  Dalgunes son muyeres encantaes a les que dalgún fechu o palabra pue desencantar. N'otres ocasiones la so llibertá dura sólo mentantu nun se pronuncie una palabra prohibida. Otres xanes son claramente entes malignos que persiguen a la xente pa matala o entren nes cases pa morder. Finalmente delles entren a robar tortos de maíz.

Apaiciones: Apaécense en cualuquier momentu'l día, ensin preferencia por unes hores o otres (3). Les mordedores y robadores de tortos actúen pela nueche.

Relaciones colos humanos: Amás de camuda-yos a otres muyeres los sos fíos polos d´elles, les xanes prometen tesoros o puen ser desencantaes (4). En determinaes circunstancies, los sos oxetos (o los tesoros que guarden) puen pasar a ser propiedá de los humanos. Dalgunes xanes tamién ataquen a la xente o roben-yos comida.

Recursos psicolóxicos que'l mitu cinca: D' un llau, llercies primitives a lo desconocíu, fundamentalmente a los espíritus que puen apropiase de los recién nacíos. D'otru, na raza más conocía, la de la xana rubia curiadora de tesoros, el mitu ta relacionáu con una visión que ve viviega la naturaleza (fontes y cueves, especialmente, llugares de siempre sagraos), asina comu les fantasíes relacionaes coles riqueces y el consuelu del estáu miserable del presente. Finalmente, el mieu a les agresiones de los que se tienen como fuerces invisibles.

Sinónimos: inxanes, xinxanes (4bis).

MODELOS DE RELATOS

1. Una muyer de Vidiagu (Llanes) taba sallando. A la oriella la tierra onde sallaba tenía'l so ñeñu dientru una macona. Al trapecer cho la macona al costín y empobinó pa casa, pero cayó na cuenta de que nun yerá'l so neñu´l que llevaba. Entós fue a la cueva la xana y pidió-ylu.

A lo que la xana arrepostió-y:

—Traélu, mala muyer, nun te lu di pa que me lu criares, dítelu pa que me lu bautizares (5).

2. Una muyer de la casa La Matiega (Grao) topó un xanu muertu de fríu. Llevolu pa casa y envolviolu nún pañu de color y usáu. Al pocu tiempu la xana llamó dende fuera al xanín y dixo a la muyer que si lu hubiera tapao con un trapu blancu y llimpiu sería rica (6).

3. Una xana tenía un fíu que nun yera pa falar. Púnxose entós metanos el camín, pa que´l primer probe (7) que pasare -y dixera lo que tenía facer. Una probé mandó-y arrodiar el fueu de cáscares de güevu y sentar al xanín al pie. Fizólo asina y entós faló'l xanín:

-Cien años va que nací,

nunca tantos pucheros

al pie del fueu vi (8).

4. Na fonte de San Roque una muyer fue coyer agua enantes de salir el sol y topó una xana a la que llevó pa casa. La xana yera pergayolera y pasaba´l día hablando y cantando con voz mui prestosa.

Dempués d´años de tar n´aquella casa, un día dixo-y a la muyer, cuando taba pa dir a la fonte:

-          Escucha bien, a ver si sientes daqué.

Al tornar, la muyer dixo-y que sintiera:

            -Madre, madruca,

            golverás tarde,

            mal y nunca!

Entós la xana tornó pa la fonte y, encloyándose pel cañu, esmuciose pa siempre. (8 bis)

4. Pel güeyu La Fontica (monte Narancu, Uviéu) salía un filu de llinu. Con él facíense bayura de duviellos pa filar, y inxamás s'acababa. Un domingu una muyer paró d'adovanar y rompiose'l filu. Entós sintióse de dientru la fonte la voz de la xana diciendo que, si nun lu hubiere roto, hubiérase acabao llueu'l so encantamientu (9).

5. Un viudu de Carrandena, conceyu de Colunga, tenía dos fiyinos. Mentantu él trabayaba la tierra, daquién cuidaba los fíos y arreglaba-y la casa, ensin qu'él supiera quién yera. Un día quedóse escondíu y descubrió que yera una xana. Entós propuso-y quedase a vivir con él. Ella aceptó cola condición de que si, de la que diba tolos dis a mecer al Sueve, sentía daqué al pasar pela cueva El Moru, nun-y dixera ná.

Corrieren unes dómines felices pa toos; los ñeños, sobre tou, perqueríenla y espoxigaben. Pero'l viudu entamó amurniar pocu a pocu. La xana entrugaba-y por qué taba tan triste y él nun-y contestaba. Hasta que, un día, tiempu dempués, dixo-y que de la que pasaba pela cueva El Moru, y por más qu'atapaba les oreyes, siempre sentía:

-¡Ah, xana hermana,

ven a ver a to má,

que ta mui mala!

La xana, al oílo tiró la restiella y coló pa nun volver más, dicíendo-y:

-Si hubieres aguantao cuatru dis más en contámelo, hubiéreste fechu ricu y a mí desencantábesme pa siempre (10).

6. Cerca una cueva de Ponga había una cueva habitada por una tropiella xanes.

            Pela nueche salíen a abogadar a la fonte y tendíen la ropa llavada a los rayinos la lluna. Al riscar poníense a filar y adovanar nun camperín delantre la cueva.

            Pasaba perillí tolos díes un pastor perguapu y bon cantor.

            Pasu ente pasu fue faciéndose amigu les xanes, y, mentantu´l so ganáu pastiaba, él xugaba al esconderite pente les peñes con elles y baillaba la xiraldilla nes camperes.

            Y´l pastor enamorose de la xana más guapa, y declarose-y. Y ella dixo-y:

            Pa poder sacame d´equí tienes que facer lo siguiente: cuandu les mios collacies y yo nos acerquemos a la cueva tieres enriba mí un puñaín de tierra de la ilesia (11) y, entós, soi tuya.

            El pastor fízolo asina y llevola pa consigu.

            Un día que la xana taba restiellando, aportó´l pastor del monte y díxo-y que, al pasar per delantre la cueva, sintiera:

                        -¡Ah, xana hermana!

                        ¡Colaste y dexástenos soles!

            La xana tiro-y cola restiella y esapaeció de casa pa siempre (12).

7. A un pastor apeciose-y una vieya, que-y dio un bollu de cuatru cuernos ordenando-y llevalu a La Cueva La Xana. Al llegar a casa prohibió-y a la muyer tocar nel zurrón, onde llevaba'l bollu. Ensin embargu la muyer nun pudo caltenese y quitó-y ún de los cuatru cuernos.

A la mañana siguiente, ensin alvertilo, el pastor empobinó pa la braña y llamó a la xana. Dempués d'un ratu salió enriba un caballu blancu al que-y faltaba una pata. Entós la xana desplicó-y que nun podía desencantase porque la muyer quitara-y´l garitu al bollu y, entós, perdiera una pata´l caballu, colo qu´ella nun podía dise (13).

8. Una muyer vio salir de les agües d'un regatu un filu d'una seda perguapa. Entamó facer un duviellu con él y nun terminaba inxamás. Entós cortolu. A pocu oyóse una voz que salía del agua:

-¡Por qué pocu lu perdiste! (14).

9. A una xana diéren-y de sutrucu los puxos del partu y entamó gritar. Una cordurera que pasaba perillí ayudóla. Agradecida, dio-y a escoyer ente una serie d'oxetos. Ella escoyó unes tisories d'oru (15).

10. En Puertu (Somiéu) una xana de les que vivíen nuna fonte tenía los sos tesoros asoleyándose. Un home pasó y, nun descuidu, arrampuñó un cáliz d'oru. Entamó a correr; la xana escorríalu camudada en borrina. Viéndose perdíu l'home glayó:

-¡Santiagu d'Aguinu,

valme, que ye pa ti!

La borrina esapaeció y l'home entregó'l cáliz na ilesia (16).

11. Les xanes salíen pela nueche la so cueva. Dormíen embaxu los horros, y entraben nes cases pel pesllín de la puerte faciéndose como mosques. Dempués picaben  y mordíen a los que dormín (17).

12. La Tía Toribia quexose al Tíu Andrés:

                        -Anueche taba filando, vieno una xana y robome´l tortu.

Y´l Tíu Andrés dixo-y a la Tía Toribia:

-Pues esta nueche vo quedame yo, ya verás cómo a mín non me lu lleva.

Entós fue´l Tíu Andrés y calentó una teya hasta ponela ingrieta y colocola enriba´l llar, como si fuere´l tortu y púnxose cola rueca a filar. Pero tenía la barba blanco.

Y  la xana abrió la puerte, y´l Tíu Andrés sintiola rinchar; pero él quietu ensin movese, como que filaba. Y la xana dende la puerte, escucando:

¡Barbes blanques, munchu files! ¡Tuerces, pero non salives!

Y él filaba y filaba, pero non salivaba. Y la xana volvió deci-y:

¡Barbes blanques, munchu files! ¡Tuerces, pero non salives!

Y entós ella, viendo que nun-y contestaben nin-y decín nada, garró la teya a la escapitina, creyendo que yera un tortu, y metiolu en pechu. Y quemose dafechu, y salía escopetiada quexándose:

                        -¡Que me quemé, que me quemé, que me quemé! (18).

DESENDOLCAMIENTU

Les xanes (del llatín Diana, la diosa de la caza, y después ´ninfa`), son, na so versión más estendía na cultura popular urbana,  personajes femeninos, de forma humana, perguapes y de llarga cabellera rubia (precisamente comu l'oru que custodien y, amás, fuera de la tonalidá habitual de la melota de la xente asturiana, lo que sorraya´l so calter “estraordinariu”). Viven en fontes, d´onde suelen salir pel güeyu l'agua, y cueves (esto ye, nos dos casos, nel fondu la naturaleza), separtaes, darréu, del habitat humanu y de la so vista. Esi ye'l nucleu fundamental. Dalgunes consideraciones de forma, tamañu, etc., son secundaries y variables. Dependen del narrador o la tradición na que s'enxerte la so narración. Otres visualizaciones, ensin embargu, faenles pequeñes, roínes, prietes, fees y males.

L'oru o la plata de los sos aperios tienen una doble función: d'un llau marquen la so pertenencia al mundu lo maraviosu; d'otra sirven, en dalgunes narraciones, p'abrir a los humanos la posibilidá d'algamar riqueces.

Na imaxen mítica de la xana vienen enxertase cuatro estayes máxicu-simbóliques de calter estremáu y con distintu valir psicolóxicu:

a) Camudadores de ñeños. La creencia en fades que camuden los sos ñeños polos de los humanos esiste n'otres cultures. Probablemente, nel aniciu, fueren estes xanes seres maléficos (19). Nel estadiu nel que'l mitu aporta a nós nun muestren dafechamente esi calter, anque sigan camudando ñeños. Ye más, dalguna narración parez tar aprovechada con fines didácticos, comu asocede nel númeru 1 de les lleendes qu'enriba damos de modelu, na que la xana afirma que camudó'l ñeñu cola muyer pa que-y lu bautizara. En tou casu, ello paez indicar una pervivencia grande del puxu del mitu, polo que surdiría l'intentu cristianizador p´aprovechar esa vitalidá.

Añadamos, comu pura hipótesis, la posibilidá de que les tisories (atributu-símbolu de la muerte n'otres cultures y mitoloxíes y elementu negativu en munches de les narraciones de xanes) sean un restu d'esa primitiva mena maléfica de la xana (20).

b) Ñates de fortuna. Por robu o por premiu, les xanes puen proporcionar tesoros a los humanos.

Dotramiente, les xanes puen conceder bienes durante'l tiempu en que se cumplan dalgunes condiciones; incumplíes éstes, los bienes (coses) tornen al so ser anterior. Los relatos de que disponemos terminen casi siempre col fracasu, permaneciendo asina'l mundu humanu separtáu del máxicu, ensin soldadura, anque esta soldadura (y felicidá) s'haiga producío durante un tiempu nel relatu.

c) Suxetos-oxetos d'encantamientu. Les xanes puen tener temporalmente esa condición por tar encantaes (seríen muyeres humanes, en realidá, camudaes temporalmente en xanes). Unes palabres acertaes, el pasar con bien determinada preba, puen desencántales.

Dende otru puntu vista clasificatoriu, estes narraciones puen estremase en dos, según sea'l tipu de preba qu'apaez:  ya un actu que nun pueda facese, ya unes palabres que nun puen pronunciase, les palabres prohibíes. Tantu'l tema l'encantamientu comu'l de les palabres o actos prohibíos tienen una riestra exemplos na simboloxía mítica de tolos tiempos. Aurelio de Llano mesmu recueye un balagar d'exemplos que nun tán dafechamente relacionados coles xanes, anque en munchos d'ellos podamos talantar (y nós facémoslo asina) que, anque ensin nomala, tamos en presencia d'una xana (21). Otres veces ye una mora la guardiana,  persona que, con distintu nome, cumple la mesma función d'esta estaya c (ser suxetos-oxetos d´encantamientu) que conforma'l mitu la xana.

d) Seres malignos.

Hai delles tribes de xanes malignes. Delles xanes entren nes cases pel pesllín la cerradura y causen mordedures a les persones, sobre tou, anque non únicamente, neños y muyeres, fundamentalmente nes pates y brazos (22).

Otres desurden del ríu y piden a los mozos un pañuelu pa desencantales. Si-yos lu dan cola derecha, el mozu somorguiase nel ríu y esapaez pa siempre (23).

En relación con elles tán aquelles que camuden a la xente en páxaros o animales o que, si ven a ún, encántenlu tamién pa siempre con elles na cueva o na fonte (24).

Dalgunes finalmente, entreguen oxetos capaces de destruir a les persones. Asina, la xana que (nuna narración de Ribesella recoyía por Cabal) nun se pue desencantar porque´l personaxe masculín que lo tenía que facer comió un cuernu del bollu máxicu de pan, da-y un cinturón que, como la prenda´l centauru Nesu de Deyanira, faríalu arder al ponelu (25).

Nesta estaya de seres malignos (naturalmente, nun tonu menor de malignidá, nestis casu) podemos enxertar les xanes nocturnes robadores de tortos.

Según vemos, entós, les xanes -seres femeninos de lo fondu la tierra y l'agua- axunten en sí cuatru núcleos temáticu-simbólicos, que representen otres tantes espresiones d'inquietudes psicolóxiques: el mieu a lo desconocíu y l'atracción, al empar, por ello; l'ansia de posesión y riqueces; la visión máxica de la naturaleza; el temor a seres hipotéticos de calter dañible. Estos cuatru rasgos nun agoten, ensin embargu, tol so conteníu simbólicu-máxicu, munchu más ricu, según se vendrá albidrando.

Per otru llau, ye casi seguru que'l de la xana ye un mitu que, nel estáu que lu conocemos, fórmase por acumulación de cuatru estayes mitolóxicu-simbóliques, en principiu independientes. Aniciau'l nome na Diana llatina, debió dir recoyendo elementos provenientes d'otres proyeciones mitolóxiques, seguramente dalguna d'elles, tala la de camudadora de ñeños, anterior al so propiu nome romanu. A ello debió sumase'l calter de xenios de cueves y agües (probablemente emparentáu coles ninfes romanes y reforzáu por les propies característiques de les ninfes, al producise´l desplazamientu'l nome de “Diana” -´diosa de la caza`- a “diana” -´ninfa`-) y los mitemes universales de, respectivamente,  les fortunes ocultes (afitáu ésti polos manuscritos-galcetes realmente esistentes sobre los tesoros escondíos o ayalgues) y los encantos de doncelles; los dos, al mesmu tiempu, frecuentemente xuníos, ya que suel ser una dama la guardiana los tesoros. Sobre ello, debió xuntase dende´l principiu la idea de los xenios maléficos, que se reforzaría nel pasu´l tiempu col discursu cultural, especialmente medieval,  sobre les bruxes, col que se tracamundia a vegaes. Concepciones  animistes (la conversión n´animales de los homes), dellos elementos de relatos cultos (como los cinturones máxicos-maléficos) sumárense tamién nesi llargu procesu, y los ataques nocturnos a les cases (pa morder o robar).

(Por Xuan Xosé Sánchez Vicente y Xesús Cañedo Valle)

Ilustración: Acuarela. Nacho Sánchez Vicente