A 'Antany Silva' arrestáronlu efectivos de la Policía Militar y Xudicial y treslladáronlu a dependencies de la Policía Nacional. Alredor d'elles empezó a concentrase un ensame, según informó'l diariu local 'Expresso'.

   La familia de Silva reveló que'l militar visitólos el pasáu llunes, cuando asocederíen los fechos, pa conta-yos que matara una a una a once persones, anque nun esplicó los motivos. La Policía alcontró un fusil desapaecíu y trés cargadores.

   Silva, de 23 años, mataría a ocho militares y trés civiles, incluyíos dos españoles que trabayen nel caltenimientu de les antenes instalaes en Monte Txote. La empresa alertó a les autoridaes porque nun tornaren al so hotel, lo que motivó la busca y el descubrimientu de los once cadabres.

   El Gobiernu espresó'l so pesar por "esta traxedia" y prometió facer "tolos esfuerzos" pa prindar al responsable y llevalu ante la Xusticia. "Siempre nos distinguimos por ser un país que procura garantizar les condiciones de seguridá y vamos siguir por esta senda", dixo'l primer ministru, Ulisses Correia.

   "Los fallecimientos asocedíos nesta aciaga masacre representen pa les families, pal Gobiernu y pa tola nación cabuverdiana perdes irreparables", dixo nun comunicáu.

   Les autoridaes tuvieron que salir al pasu de les informaciones publicaes pola prensa llocal, qu'apuntaben a que'l socesu year una represalia del crime organizáu pola estratexa antidrogues del nuevu Gobiernu o inclusive un golpe d'Estáu.