El supuestu 'cerebru' de los atentaos d'Estáu Islámicu en París, Abdelhamid Abaaoud, morrió mientres la operación policial d'esti miércoles en Saint Denis, según dos fontes de los servicios d'Intelixencia europeos citaes pol periódicu estaounidense 'The Washington Post'.
El Gobiernu francés nun confirmó'l fallecimientu d´Abaaoud, anque les fontes citaes por 'The Washington Post' aseguraron que yá se pudo verificar la identidá tres los analises forenses realizaos nel edificiu allanáu al norte de la capital gala.
Según les primeres informaciones revelaes poles mesmes autoridaes, dos persones morrieron nesta operación, ente elles una muyer que s'inmoló, y dellos medios de comunicación apuntaron a la posibilidá d'un tercer fináu.
Sicasí, el fiscal de la República, François Molins, aseguró nuna comparecencia pública que tovía nun puen confirmar cuántes persones morrieron nin tampoco les sos identidaes. Sí esclaró, sicasí, qu'Abaaoud nun figura ente los deteníos.
Abaaoud, de 29 años d'edá y nacionalidá belga, resultó condenáu en xunetu d'esti añu por un tribunal de Bélxica a 20 años de cárcel pola so vinculación con una rede yihadista. La condena dictóse n'ausencia del acusáu, que figuraba como fugáu a Siria.
Foto: HANDOUT . / REUTERS
