Un neñu de dos años recibió l'impactu d'una bengala esti miércoles de nueche nel estadiu Vicente Calderón, onde se disputaba un partíu de la Lliga de Campeones ente l'Atlético de Madrid y el Benfica.
Asina lo relató'l padre del neñu, Seriu Yébenes, en declaraciones a la Cadena Ser recoyíes por Europa Press. El padre precisó qu'al neñu namás se-y quemó un pocu la camiseta, porque lo retiraron rápido, pero la bengala cayó nel asientu.
"Asustámonos muncho", dixo, y relató que'l menor quedó "tremeciendo". Asina, llamentó que los haya que vayan al fútbol "a armala" y que nun se puea disfrutar d'un partíu en familia.
Los incidentes produxéronse cuando aficionaos del Benfica llanzaron bengales a los sos homólogos del Atlético de Madrid nel trescursu del partíu, declaráu d'altu riesgu, ente dambos equipos.
Los siguidores portugueses, qu'intentaron algamar el verde tres el gol del empate --obra de Nico Gaitán--, tiraron les bengales a la parte de seguridá ente la grada y el campu, asina como a los asientos onde s'ubiquen aficionaos colchoneros.
L'Atlético de Madrid pidió pela megafonía del estadiu'l cese del llanzamientu d'artefactos pirotécnicos, amenazando cola so espulsión a tolos siguidores portugueses qu'incumplieren la midida.
