Un xuez federal de Luisiana (Estaos Uníos) ordenó poner en llibertá a Albert Woodfox, un home que lleva 43 años zarráu en prisión en réxime d'aislamientu, según informó'l diariu 'USA Today'.

   La orde del xuez llegó esti llunes y torna la segunda condena impuesta a Woodfox pol asesinatu d'un guardia de la prisión estatal de la población d'Angola, en Luisiana. El xuez prohibió, amás, que Woodfox se someta a un tercer xuiciu por esti casu.

   El reclusu siempre caltuvo que yera inocente y aseguró que lu implicaron nel asesinatu del guardia porque contribuyó a entamar una estaya de los Panteres Negres nel centru penitenciariu. Woodfox taba na cárcel cuando asocedió'l crime por una condena por robu con armes.

   La orde firmada pol xuez de distritu estaounidense James Brady, de Baton Rouge, cita dellos motivos pa poner al presu en llibertá, ente otros que Woodfox nun tuvo una defensa xusta. El xuez caltién que les autoridaes estatales nun actuaron correctamente pa llograr la so condena y recuerda que tolos testigos que presentó nel procesu tán agora muertos, según esplicó per teléfonu George Kendall, l'abogáu de Woodfox.

   "Esta orde pon xusticia", afirmó Kendall, esti llunes de nueche. "Nun pue haber otru xuiciu nesti casu, polo que'l fallu ye magníficu", señaló. Woodfox tien agora 68 años y sufre un fallu renal, problemes de corazón y hepatitis c. "La traxedia de too esto ye que nun se-y trató nengún de los problemes", esplicó, antes d'indicar que la hepatitis c pue derivar nun cáncer de fégadu.

   Woodfox ye conocíu por ser unu de 'Los trés d'Angola', los presos condenaos pola muerte del guardia d'esa prisión. Los otros quedaron en llibertá va tiempu. Woodfox ta consideráu como'l presu que pasó más tiempu en prisión en réxime d'aislamientu en tou Estaos Uníos, según el so abogáu.

   Kendall aseguró que la decisión del xuez nun ye definitiva y que cree que les autoridaes estatales van recurrir el fallu. Un representante estatal manifestó'l so malestar pola decisión del xuez. "Cola orde de güei, el tribunal decidió poner llibertá a un asesín condenáu dos veces y que taba a la espera de xuiciu pol brutal asesinatu del oficial penitenciariu Brent Miller", afirmó'l director de Comunicación del Departamentu de Prisiones de Luisiana, Aaron Sadler, en declaraciones al diariu 'The Times-Picayune'.