Según les últimes informaciones facilitaes pola Fiscalía francesa, el copilotu del avión de Germanwings estrelláu nos Alpes esti pasáu martes taba solu na cabina del avión y "calcó de manera voluntaria" el botón de descensu. Trátase d'Andreas Lubitz, que cuntaba con una esperiencia de 630 hores de vuelu cola aerollinia.

   De 28 años, yera miembru de l'asociación de vuelu alemana LSC Westerwald, dende la qu'esti miércoles llanzaron un mensaxe de pésame pola muerte del so antiguu compañeru. Según publicó'l diariu alemán Bild, el copilotu entamó d'adolescente nel mundu de l'aeronáutica col oxetivu de cumplir el so suañu: pilotar un avión. Empezó con vuelos sin motor y dempués especializóse nos Airbus A320, el modelu d'aeronave que s'estrelló nos Alpes.

   El copilotu trabayaba pa l'aerollinia dende setiembre del 2013, amás de trabayar pa Germanwings. Lufthansa informó qu'antes tuvo destináu na escuela d'aviación civil de la compañía. Yera natural de Montabaur, un pequeñu pueblu ente Dusseldorf y Frankfurt. La so formación desarrollóse en Bremen, al norte del país, según publica Bild.

   El fiscal de Marsella, Brice Robin, dixo nun tener más detalles sobre la etnia o la relixón a la que pertenecería'l copilotu, magar aseguró que nun taba na llista de terroristes buscaos. Según esplicó, la Xendarmería francesa, en collaboración coles autoridaes alemanes yá tán investigándolu y de seguramente va preguntase al entornu más cercanu pa tratar d'esclarar lo asocedío.