La politóloga asturiana Estefanía Torres tomó esti miércoles posesión de la so acta como eurodiputada de Podemos, en sustitución del secretariu xeneral de la formación n'Aragón, Pablo Echenique, qu'abandonó la Eurocámara el pasáu 15 de marzu pa dedicase a la so candidatura nes primaries autonómiques, nes qu'aspira a ser la cabeza de llista de la 'formación morada' na Comunidá.

   Torres, que prometió "acatar la Constitución mientres la xunta que celebró la Xunta Electoral Central nel Congresu de los Diputaos la mañana d'esti miércoles, desplazóse darréu dempués a Bruxeles pa estrenase nel Parlamentu Européu, onde yá tomó posesión del so escañu pa participar na so primer votación.

   "Sí, prometo acatar la Constitución hasta que la xente del mio país la cambie pa recuperar la so soberanía y sos derechos sociales", manifestó la nueva eurodiputada n'asturianu, ante la Xunta Central Electoral, según confirmó Podemos a Europa Press.

   La politóloga asturiana de Cuideiru, qu'ocupó l'octavu puestu na llista cola que Podemos acudió nes elecciones europees, tornó d'esta manera na quinta eurodiputada de la 'formación morada' y va trabayar dende esti miércoles baxo'l lideralgu de Pablo Iglesias, qu'amás de secretariu xeneral del partíu sigue siendo'l xefe de la delegación de Podemos nel Parlamentu Européu.

   En concreto, Torres va integrase nel Intergrupu de Minoríes Llingüístiques y va formar parte de la Comisión d'Agricultura y Desarrollu Rural, y de la Comisión de Mediu Ambiente, Salú Pública y Seguridá Alimentario.