El 36 por cientu de los nuevos consumidores de cannabis son menores d'edá, según mostró la Encuesta Domiciliaria sobre Alcohol y otres Drogues 2013/2014 (Edaes), ellaborada pol Plan Nacional sobre Drogues, dependiente del Ministeriu de Sanidá, Servicios Sociales ya Igualdá.
Amás, los resultaos, que se llograron n'entrevistando a 23.136 persones de toles comunidaes autónomes y con edaes d'ente los 15 y los 64 años, muestren que nel últimu añu previu a la encuesta empezaron a consumir cannabis 168.677 persones, de los que 61.085 teníen ente 15 y 17 años. Ello ye que fueron más que les persones qu'empezaron a consumir tabacu (142.282).
De la mesma, la encuesta reflexa qu'el 2,2 por cientu de la población española de 15 a 64 años (más de 700.000 persones) cumple los criterios requeríos pal diagnósticu d'usu problemático d'esta sustancia. Ante ello, el delegáu del Gobiernu pal Plan Nacional sobre Drogues, Francisco Babín, puntualizó que l'usu d'esta sustancia ye cinco puntos más eleváu ente los menores de 15 a 17 años qu'ente los adultos de 18 a 64 años.
Amás, el consumu diariu asciende dos décimes al respective de les anteriores encuestes ente la población de 15 a 64 años, lo que supón que sobre 620.000 persones fumen esta sustancia tolos díes, siendo especialmente homes los consumidores. Sicasí, la prevalencia del consumu baxó lixeramente dao que, por casu, el 9,2 por cientu reconoz que lo probó dalguna vez nel últimu añu (frente al 9,6% del estudiu anterior) y el 6,6 por cientu dalguna vez nel últimu mes (7% nel 2011/2012).
Coles mesmes, ente les sustancies illegales, el cannabis ponse como la más accesible, puesto que'l 64,6 por cientu cree que podría adquirilo fácilmente. Sicasí, dos tercios de la población nun considera la so llegalización como una midida "bien eficaz" pa resolver el problema de les drogues.
"Tamos nuna dinámica bien peligrosa nel consumu de cannabis, dao que'l consumu más problemáticu ye ente los mozos", insistió Babín, pa comentar que la banalización del so consumu ta siendo un "elementu clave" dende'l puntu de vista de la incorporación de nuevos consumidores.
Foto: FLICKR/WEIMAR MENESES
