La Fiscalía del Tribunal Supremu opúnxose a la realización a Juan Carlos de Borbón d'una prueba d'ADN nun escritu nel qu'apoya'l recursu presentáu polos abogaos del monarca contra l'almisión a trámite de la demanda de paternidá de la ciudadana belga Ingrid Jeanne Sartiau. Nun ye'l momentu procesal oportunu pa realizar esta prueba antemanada, argumenta.

   Nel escritu presentáu ante la Sala de lo Civil del altu tribunal, el Ministeriu Públicu calca nos mesmos argumentos que yá espunxo pa oponese a la tramitación d'esti procedimientu, según informaron a Europa Press fontes xurídiques.

   Asina, el fiscal insiste en que l'asuntu nun tien que dir más allá porque la demanda nun s'acompaña del principiu de prueba qu'establez l'artículu 767.1 de la Llei d'Enxuiciamientu Civil. Según el mesmu, "en nengún casu almitirá la demanda sobre determinación o impugnación de la filiación si con ella nun se presenta un principiu de prueba de los fechos en que se funde".

   Nel so escritu, el fiscal incide nel "escasu caudal probatorio" conteníu na demanda de Sartiau y fai mención a la so apaición pública agora poco nun programa televisivu nel qu'esta muyer dio una versión distinta a la contenida na so demanda ante'l Supremu.

   Insiste tamién la Fiscalía, según les mesmes fontes, en que la demanda fala d'unos fechos acaecíos hai más de 40 años sin malpenes apurrir datos concretos algunos que los certifique.

   El pasáu mes de xineru la Sala de lo Civil del Tribunal Supremu almitió a trámite la demanda al entender que se daben los requisitos llegales pa ello, en celebrando una xunta que se prollongó mientres cuatro hores.

   "L'altu tribunal tornara antes otra demanda asemeyada contra Juan Carlos de Borbón presentada pol catalán Alberto Solá, qu'aseguraba ser el so primoxénitu, y acompañábase d'una prueba d'ADN con una fiabilidá superior al 99,9 por cientu", según la demanda.