El Grupu de Portadores de Tradición Oral Santiso del Eo participa nuna amuesa de vezos y oficios tradicionales nel colexu públicu Ramón de Campoamor de Navia. Los escolares d’esti conceyu van poder asina disfrutar d’una xera de convivencia con portadores de tradición oral de Santiso d’Abres, pal día que’l centru escolar destina al popular amagüestu de castañes, optando asina por dar a conocer la cultura tradicional de la comarca.

Una docena de sentiseños van amosar a los escolares de Navia, vezos como la ellaboración artesanal del xabón, l’amasáu caseru del pan, el procesu de tresformación de la llana, dende que sal de la oveya hasta convertila n’escarpinos, y oficios cásique extinguíos como’l madreñeru, el carpinteru, el cesterum el zapateru, el torneru o los serradores.

L’amuesa va desarrollase de diez de la mañana a dos de la tarde, simultanea a l’actividá festiva del amagüestu, na que tamién van tener accesu les families. Asina, con esti tipu d’amueses l’Asociación Cultural Santiso del Eo –que coordina’l grupu. continúa col llabor puestu en marcha nel añu 2005 del Plan de Salvaguarda de la Cultura Tradicional de la Comarca del Eo-Navia de divulgación de los aspectos más relevantes del pasáu reciente de la comarca eonaviega.

La edá avanzada de los componentes del grupu dificulta les amueses n’actos culturales, lo que fai que la entidá se ciña más a les amueses en centros educativos, que ye precisamente la so finalidá d’orixen.