L’atención sobre los grandes creadores suel movese ente les feches que delimiten los aniversarios del so nacimientu y muerte, estos fitos que guíen al que nun tien otra brúxula. Si nel promediu del vivir del ser humanu dambes efemérides suelen distar un par de décades (y más, col aumentu pprogresivu de les expectatives de vida), nel casu de Luis Cernuda puen fixase en 2002, centenariu del nacimientu, y 2013, cincuentenariu de la muerte. Un periodu non mui llargu, como se ve, como tampoco lo ye’l númberu de díes que disten ente’l so allumamientu, un 21 de setiembre, y el del so decesu, un 5 de payares.

Nel intervalu de 2001 a 2013 avanzóse enforma nel conocimientu de la so figura. El centenariu propició un bon númberu de publicaciones ente les que destaquen l’Álbum y l’Epistolariu, con un trabayu encomiable de James Valender; en feches posteriores, Antonio Rivero atropó tolo que se publicara sobre’l poeta sevillanu, amestando fontes hasta entós ignoraes, y punxo manes a la obra n’escribir la biografía amplia que Cernuda desixía y cola qu’inda nun contaba.

Amás de la so obra, xeneralmente mui apreciada, y de lo qu’el contaba d’él mesmu como autor d’ella en “Historia de un libro”, de Cernuda sabíase que fue4ra un home d’izquierdes, que participara nel llabor d’extensión cultural republicana al traviés de les Misiones Pedagoxíques, qu’abrazara la causa antifascista y qu’al marchar al exiliu en plena contienda, febreru de 1938, comenzó una penosa andadura per Inglaterra, Francia, Escocia, de nuevo Inglaterra y, yá en meyor posición, los Estaos Xuníos d’América. La estancia en Cuba fue un paréntesis gozosu, como’l primer contactu con México, onde diba recuperar la llingua, los amigos y diba recobrar l’amor.

Dos díes depués del cincuentenariu de la muerte de Cernuda conmemórase’l de Camus. Salvando les enormes distancies, el carácter independiente de Cernuda, el so ansia de llibertá per encima de toa cosa, y conciliáu esi afán con una idea de xusticia ayena a totalitarismos, avéralu, si bien nun buscó él protagonismu social nin políticu, al autor de “El primer hombre”; como’l más ortodoxu Rafael Alberti, cola so muyer María Teresa León, diba ser un equivalente estalinista de Jean-Paul Sartre y la so pareya Simone de Beauvoir. Cernuda emitió severos sobre’l doctrinarismu d’Alberti nel capítulu que-y dedicó n’Estudios sobre poesía española contemporanea. Hai ellí una pista pa demostrar el so allonxamientu del comunismu, dalgo no va na papalelu a Paz, y dambos a Camus.

Tamién matiza la imaxen que se tenía de Cernuda la correspondencia inédita que mantuviera con Salvador de Madariaga y que’l citáu Antonio Rivero afayara nel archivu d’esti y que s’incorproren agora nel segundu tomu de la biografía del poeta sevillanu.

Portada: Retrato de Luis Cernuda. Gregorio Prieto.