LOS PATARICOS   

Figura: Son seres de figura humana (1), con un solu güeyu na frente. Probablemente xigantes (2).

Allugamientu: Viven nun país marítimu llonxanu indetermináu.

 Acciones: Comen a los navegantes que s'averen a les sos costes.

Atributos: Tienen olfatu finísimu, que detecta les víctimes de lloñe.

Impulsos psicolóxicos que'l mitu cinca: Les llercies a lo indomatible y desconocío. La fantasía de los monstruos que dominen los territorios inesploraos, los mieos de la soledá de la mar ensin llendes.

DESENDOLCAMIENTU

Ye esti un de los mitos que más tempranu perdieren el so puxu social, al mesmu tiempu que ún de los menos conocíos. Enxaretáu coles milenta lleendes que deriven del mitu del Cíclope (arrecoyíu na Odisea ya), los pataricos (pues nun ye un sólu ser, sinón tou un pueblu de xentes iguales - como los collacios de Polifemu na tradición clásica, por ciertu-) tien los sos parientes peninsulares nel Ojáncano cántabru y nel Tártaro de les lleendes vasques. Bernardo Acevedo y Huelves y Marcelino Fernández, que son los que falen d'él nel so Vocabulario del Bable de Occidente (3), afirmen que la creencia nel mitu taba ya estrincada na rodiada de 1880.

NOTES

1.  Nun sabemos cuála ye la etimoloxía del nome, que, en principiu, paez venir de pata. Ye una tentación creer nun tracamundiu o mala tresmisión y suponer que'l nome, mal arrecoyíu por Acevedu y Fernández (o meyor, tresmitíu ya mal polos informantes), yera en realidá Paparicu, de “papar”, ´comer`. Pero ello nun ye más qu´una suposición ensin munchu fundamentu.

2. De los datos que tenemos nun se pescuda que fueren xigantes. Ramón Baragaño y Luis Argüelles (ésti n'artículos apaecíos nel diariu El Comercio de feches 6-6-84, 21-6-84 y 18-6-84, nos que nun aporta datu nuevu) talanten que lo fueren, por la semeyanza col mitu de Polifemu.

Acevedo Huelves, Bernardo y Fernández Fernández Marcelino, Vocabulario del bable de occidente, Madrid, 1932.

LA SERENA (1)

Figura: Metada superior, muyer; metada inferior, pexe (2). Son perguapes.

Allugamientu: La mar, particularmente les zones cercanes a la costa. Otra triba de serenes, les serenes/xana viven nes agües de los ríos y fontes.

Atributos; Les serenes marines distínguense pol so cantu, dafechamente maraviosu (3).

Acciones: Dalgunes vegaes, les serenes atraen col so cantu a los marineros, encantándolos, faciéndo-yos dañu o faciéndolos naufragar.

Relaciones colos humanos: Dalgunes serenes son moces encantaes. Otres enamoren a los humanos y lleguen a tener fíos con ellos.

Recursos psicolóxicos que'l mitu cinca: La fantasía lo desconocíu; la llercia de la soledá y los grandes espacios; el rixu; la fantasía de la muyer permaraviosa  y fatal, encantadora/destructora de varones; los seres fantásticos que pueblen los desconocío.

Ver notaes de Vigón y de Torner, a lo cabero.

MODELOS DE LLEENDES

1. Serena, una rapaza perguapa, nun facía otra cosa qu'abeyar pelos pedreros a la gueta llámpares, bígaros, pulpos... La so ma taba tan esmolgada por esa afición qu'un di dixo-y:

-¡Asina te ficieres pexe!

Y un di, al métese nel agua, sintió que diba camudándose, y ficiérense-y cola les piernes y cubriose d'escames. Pero a pocu consoló, nalando pel agua, allugándose ente les roques, cantando perdulcemente y, de xemes en cuandu, enfallentando a los humanos col so canciu (4).

2. Una serena quedó preñada d´un capitán y parió un fíu na mar. Les gavilotes recoyérenlu nel océanu y llevárenlu a tierra pa ser bautizáu, por esa razón punxeren-y  El Gaviluetu. Col tiempu fo capitán de mar na guerra y casó con una infantina de Portugal (5).

3. Una vegada un rapaz que yera pescador alcontró una moza na playa, cantando metida nel agua. Yera perguapa y enamorose d´ella. El diba tolos díes a vela, pero, en cuantes asomaba, ella calumbábase nel agua y esapaecía. Hasta qu´un día él tirose tres d´ella al agua. Y entós descubrió que nun tenía pies, sinón cola pexe, que yera una serena (6).

4. Un piescador de caña pescó una serena. Ella manda que la corte n´ochu cachos iguales y que-y dea dos pa comer a la so muyer; dos, pa la yegua; dos, pa la perra; y dos que los entierre embaxu un naranxal que l´home tien en güertu. De resultes, la muyer parió dos ñeños ximielgos; la yegua, dos caballos; la perra, dos perrinos; y embaxu´l naranxal nacieren dos llances; y too ello, xiemelgo. A los venti años, Xuan, ún de los fíos ximielgos garra caballu, llancia y perru y marcha a conocer mundu. Nuna ciudá una princesa enamórase d´él dempués d´un tornéu y cásense.

Un día Xuan sal de caza y atopa´l Palaciu los Encantos, onde´l qu´entra nun torna salir. Al allegase recíbelu una moza perguapa que lu manda pasar, y, entós, esapaez. Nesi mesmu momentu, la llanza del so hermanu, Antón, aferruña, ñiciu de que Xuan ta en peligru. Antón garra llancia, caballu y perru y marcha pa la ciudá a la gueta´l so hermanu, alcontrando a la princesa que yera muyer de Xuan, que, por ciertu, non ye pa estremalu d´esti, porque, como ximielgos, son perpaecíos. Antón empobina pal Palaciu los Encantos; ellí obliga a la moza que sal a recibilu a que-y diga ú ta´l so hermanu.

Ella mándalu a la Cueva los Encantos a matar una palomba blanca, pa, dempués de matala, saca-y un güevu. De la que lo faiga asina -desplica-y-, les puertes del Palaciu los Encantos van abrise soles. Entós tendrá d´adientrase hasta un salón onde tará durmiendo un xigante; dara-y col güevu na frente y l´encantu´l Palaciu va esmucise. Antón failo asina y mientres lo fai tien qu´engarriase con otros dos xigantes cola ayuda del perru y la llancia. Al francer l´encantu llibera al so hermanu Xuan y a tolos príncipes y princeses que taben ellí encantaos. Como nun podía ser por menos, Antón cásase con una d´elles (7).

5. Una vegada llegara una encantada dientru un arca nun arroxu fánagu hasta´l Narcea. La encantada, metada muyer, metada pexe, andaba pel Pozu la Rincona y veíasela pasar per baxu la Ponte´l Llanu. Un día robó un ñeñu a una muyer que taba segando trigu na Campa y dixo que non lu devolvía si nun acertaben cuántos años tenía.

La madre, esmolecía, fue ver a una muyer que llamaben Redonda y ésta dixo-y:

                        -Nun t´esmuelas, vete al mercáu de Cangas, compra tolos cacharros que vendian y ponlos na peña la fonte peronde andaba la encantada.

Fízola asina, salió la encantada y dixo:

                        -Venticincu años va que nací y nunca tantu pucheru vi.

            Entós supieren la so edá y la madre pudo deci-yla y recuperar al ñeñu.

            Pero la encantada seguía ellí, y ná más pudieren sacala del ríu chando dos gües ximielgos xuncíos a una gradia, ya que los gües fueren críaos con tola llechi la vaca.

            El casu ye que en Casa Cueiras nacieran dos gües ximielgos, iguales. La encantada, que lo supo, fue p´allá disfrazada de muyer pidiendo una canada llechi, y la muyer de la casa dába-ylo, pero l´home diose cuenta y garró la zapica y chola penriba los gües diciendo:

                        -Lo que nun mamaste pel llombu lo llevaste.

            Cuandu crecieren cháronlos al Pozu la Rincona xuncíos a la gradia y sacárenla a rastres del agua pe los pelos. Pero enantes de morrer garró un pelu y tirolu al ríu y dixo ella:

                        -Adiós, el mio celemín, que tolos años m´entregues un pelegrín.

            Por eso´l día Santiagu (que ye´l día los pelegrinos) nun se baña la xente en ríu, porque ye un día muy azarientu y si te bañes pues morrer afogáu nél. Tamién el día Santiagu pue vese´l pelu la encantada nel nel agua (8).

DESENDOLCAMIENTU

La serena (del llatín sirena, ´id.`, y ésti del griegu) yera na mitoloxía grecullatina metada ave de presa, metada muyer, tales les serenes de La Odisea. Col tiempu pasó a ser un amiestu de pexe (d'alcuerdu col mediu nel que vive) y muyer.

Espardíu´l mitu per ayures (o con anicios distintos) les serenes asturianes nun presenten dala peculiaridá al respective de les serenes d'otres partes d´España y del mundu. Lo fundamental ye nelles la guapura´l so canciu y la so cara,                                                                                colos qu´arreyen a los marineros pa encántalos o face-yos daqué otru mal, anque paez qu'esti ultimu aspectu, el de la so gafura, fue col tiempu quedando comu motivu secundariu con relación a les sos menes graciatibles (9) y la estrañeza que causa la so persona a los que la descubren, polo menos en relación cola serena clásica, la serena grecollatina.

Per otru llau, embaxu´l mitu la serena vienen a coincidir otros asemeyaos a les de les xanes encantaes y fontes de maxa. D´estamiente, les serenes nun constituyen un solu tema mitolóxicu, sinón varios, parte los cualos son netos a los de les xanes y muyeres encantaes.

ESTUDIU Y CLASIFICACIÓN DE LES NARRACIONES

Podemos estremar dos estayes fundamentales: la de les serenes que son tales y la de les serenes que tán relacionaes con encantos o tresformaciones.

Estaya 1. Les serenes marines.

Esta primera estaya ta constituida, fundamentalmente por serenes propiamente diches. Al mesmu tiempu, el rasgu común d´elles ye que son guapes y, en dacuandu, fontes d´amor.

Triba a. Respuende al modelu 1, el de la rapaza que, pola maldición de los pás, conviértese en serena.

Ye curioso señalar que la lleenda (onde'l nome la protagonista ye'l mesmu del xenéricu) pretende  ser una especie de desplicacion del orixe de les serenes (o de dalgunes, polo menos); esto ye, el nome de la protagonista sería l´epónimu de tolos entes asemeyaos. Al mesmu tiempu, resalten nella los calteres xenerales d´estes serenes: belleza, dulzura la voz.

Dende otru puntu vista pue señalase la relación (nel mou narrativu y nel camientu desplicativu) d´esti relatu con dalgunos de los de la mañana San Xuan, onde la moza encantada yelo tamién por un castigu o maldición (inconsciente: “¡oxalá te volvieres...!”) de los sos pas (10).

Al marxen del motivu la maldición, convién señalar tamién esi arreyamientu cola mañana San Xuan y l´encantamientu, lo que pon esta narración (y les serenes, en xeneral) nuna estrencha relación coles de la estaya b.

Comu motivu secundariu apaez equí, al final la narración, otru aspectu les serenes, el maléficu: “de xemes en cuandu, enfallentando a los humanos col so canciu”, termina la nuestra narración. Esi engañu a los humanos ta, ñidiamente, en relación col recuerdu de les serenes grecollatines, fundamentalmente gafes y enfallentadores de marineros; pero tamién en relación con otros datos non narrativos de que disponemos n´Asturies, como´l que Sordo Sotres arrecueye y que citamos na nota (9).

Triba b. Entren equí aquellos relatos onde los homes entamen relación coles serenes, y, particularmente, aquellos onde los homes enamórense de les mesmes y la so guapura. Podemos estremar ente la triba b.1., representada pol modelu 3, onde un mozu enamorase d´una moza, que dempués descubre que ye serena (porque ella ocúltase), y la triba b.2., onde la relación col humanu provoca descendencia (9bis).

Estaya 2. Les serenes non marines. Les serenes son xente encantao o fontes de maxa.

Equí les serenes nun son propiamente tales o, si lo son, ye indiferente´l que lo sean, porque lo importante nun ye la so hestoria o la so relación cola mar y los pescaores, sinón el ser l´aniciu d´una complicada hestoria máxica.

Triba a. Nesta triba enxértense los relatos tipu´l modelu 4. Nellos la serena nun ye más que l´aniciu´l relatu y da igual cuálu ye´l so calter, serena o non. Lo importante ye la so capacidá profética y semadora/anicial pa otra hestoria independiente (11).

Triba b. Si les de la triba a. son entá serenes, anque ensin papel de tales, les de la b son serenes non marines, muyeres/pexes de fontes, mananciales y agües dulces. Equí amiéstense temes de les xanes (o de les encantaes), tomando sólo´l nome de serena y la forma miesta pa la protagonista.

El modelu 5 ye´l prototipu d´esta faza. Nél arrecuéyense aspectos de los relatos relacionaos coles xanes (como´l robu ñeños y l´aldovinanza los sos años al través de los cacharros que la sorprenden y la obliguen a pronunciar la fórmula: “tantos años va que nací, inxamás tantos cacharros vi” (12)) con otros estremaos, comu´l llugar del ríu malditu o los pelos qu´enxendren seres malignos (o culiebres) al espardelos o tiralos al agua.

Enxareyaos con estos relatos tán aquellos onde ye una serena/moza encantada la que se presenta al mozu pa que la desencante en forma cuélebre, pesie a la medrana que-y entra al vela embaxu esa forma espantible

(Por Xuan Xosé Sánchez Vicente y Xesús Cañedo Valle)

FOTO: Acuarela de Nacho Sánchez-Vicente