El videu ta subíu a la so páxina web y tamién disponible nel portal Youtube. El tema, como'l restu de los cantares de la formación, ta grabáu n'asturianu y en castellán ('Estraño en mi ciudada'), anque escoyeron la versión asturiana pal videclip. El tema precisamente critica la situación de los 'asturfalantes' na so propia tierra. Ye un exemplu del estilu musical guitarreru y punk d'esti conxuntu.

   'Invencibles' ye un discu compuestu por once cantares que caltienen el formatu y la filosofía billingüe de los discos anteriores y qu'apuesten, una vez más, por ritmos rápidos y llenos d'enerxía típicos de la banda.

   Con un soníu más evolucionáu y más roqueru (Dani Sevillano) y un diseñu cuidáu ya innovador (Rubén Fernández), 'Invencibles' pue que seya'l trabayu más complexu de Misiva hasta la fecha. Nél hai llugar pa temes reivindicativos y con muncha fuerza como la mesma 'Invencibles', na que collaboren Pablo y Pepo de Desakato, 'Les Ruines de la dignidá' o 'Clandestinidá'

   Otres más introspectives como 'Lo que nunca aprendí', onde collaboren Kiko y Daviz de Mala Reputación, o 'Eches a correr' con Tiby de F-Side. Amás, hai otros cortes que traten de la llocura de vida que llevamos nesta sociedá ('Peces Inertes', 'Sigue al líder').