La Fiscalía de l'Audiencia Nacional solicitó al xuez Santiago Pedraz que cite a declarar como imputáu al conceyal d'Ahora Madrid Guillermo Zapata por un supuestu delitu d'humildación a les víctimes del terrorismu que cometería al escribir na rede social Twitter dellos mensaxes "humildantes y ofensivos", ente otros, contra la víctima d'ETA Irene Villa.

   Nun escritu fechu públicu esti xueves, la fiscal Blanca Rodríguez considera que los sos comentarios, ente ellos unu nel que dicía 'Tuvieron que zarrar el campusantu de les neñes d'Alcàsser pa que nun vaya Irene Villa a por repuestos', conlleven "descreitu, menospreciu o humildación de les víctimes de los delitos terroristes y de los sos familiares".

   Amás d'esti tuit, que'l conceyal escribió'l 31 de xineru del 2011 con un usuariu llamáu casiopeaexpres, l'informe del Ministeriu Públicu menta un segundu mensaxe publicáu'l mesmu día nel que reproduz un chiste sobre l'Holocaustu: "¿Cómo meteríes a cinco millones de xudíos nun 600? Nel ceniceru".