Fai yá más de 3 años que Sergio Hidalgo (FAC) preside la Casa Conceyu de Salas. D’entós p’acá, la opacidá yá ún de los calificativos meyores pa caracterizar el llabor sacáu alantre pol so equipu de gobiernu.

Nos últimos meses grupu grande de vecinos creó nel Conceyu Salas un de los Círculos qu’existen n’Asturies del nuevu partíu Podemos. Col envís de conocer l’estáu de dellos asuntos que preocupen a los habitantes del conceyu, el Círculu Podemos Salas lleva meses mandando al rexistro del Conceyu solicitúes por escrito pa la consulta de della información público. Dellos temes, como la concesión pal abastecimiento d’agua a la empresa Asturagua, filial asturiana d’Aquagest, son obxectu d’estes peticiones, pues podían producise irregularidades na so renovación anticipada. Resáltase qu’esi ta, precisamente, baxo investigación por parte del Xulgáu de Primer Instancia y Instrucción númeru 3 d’Avilés, que lleva la trama asturiana del Casu Pokemón. La molición vecinal alredor del agua medra, y esto vese pola suba nes tarifes pa les families y la merma evidente na calidá del serviciu. Otros temes, como la xestión del terrén comunal del conceyu por parte del Ayuntamientu, tamién faen que los vecinos s’entruguen; por exemplu el Monte’l Visu foi tiráu recién desconociéndose nel Conceyu’l destín que llevaron los cuartos de la madera. Llamentablemente l’equipu de gobiernu escaez estes peticiones, contestando col silenciu alministrativu. Too a pesar de les bones palabres del alcalde, quien en priváu dixo en repetíes ocasiones a los encargaos del Círculu Podemos Salas que-ys diba facilitar la consulta de los expedientes requeríos. Ello fai que la credibilidá del alcalde penda d’un filu.

La falta tresparencia na xestión municipal faise evidente tamién echando una mirada a les probetayes actes de los Plenos municipales que l’Ayuntamientu Salas pon a disposición de la vecería na páxina web. Nelles nun se recueyen los debates nin les decisiones, la información ye críptica y perpoca, con abondes referencies a expedientes, decretos y informes que siguen fuera de la mano de la xente’l Conceyu. Aínda pior, l’acta más recién que ta disponible na web foi d’esti agostu pasáu. En plenu sieglu XXI, cuando la sociedá xunta glaya pa más tresparencia nos asuntos públicos, l’Ayuntamientu de Salas nun fai los sos deberes.

Por mor de too esto, queda claro que l’alcalde Sergio Hidalgo y el so equipu de gobiernu desempeñen el so llabor d’espalda al vecino. Nun se da tresparencia nos asuntos públicos de Salas. Poro, el círculu local de Podemos demanda un cambiu na actitú del Ayuntamientu de Salas, y que s’afite una verdadera política fecha n’abertal pa la ciudadanía. Sólo asina los vecinos podrán sentir la cercanía y la proximidá qu’han brinda-ys les instituciones municipales. Nesta dirección va continuar trabayando’l Círculu Podemos Salas, y dende les sos conceyos abiertos va siguir exixéndose claridá, tresparencia y exemplaridá na política municipal de Salas.