El Tribunal Xeneral de la UE (TXUE) anuló esti vienres les decisiones de la Comisión que declararon illegales les ayudes fiscales d'España a les multinacionales españoles por mercar empreses estranxeres. El fallu, que da la razón a compañíes como Autogrill y Bancu Santander, considera que l'Executivu comunitariu "nun demostró'l calter selectivu d'esti réxime".
La sentencia significa que les empreses españoles beneficiaries nun van tener que devolver les ayudes recibíes per mediu d'esti réxime.
El réxime en cuestión permitía a les multinacionales l'amortización del fondu de comerciu financieru (la diferencia ente'l costu de les participaciones d'una empresa y el valor de mercáu de los sos activos) na alquisición de participaciones n'empreses estranxeres. Iberdrola y Telefónica beneficiáronse d'esti réxime pa mercar Scottish Power y O2, respectivamente.
La Comisión dictaminó nel 2009 qu'esti sistema constituyía una ayuda pública illegal nel casu de l'alquisición d'empreses de la UE y nel 2011 prohibió tamién estes ayudes pa la compra de compañíes estracomunitaries. Amás, ordenó'l reembolsu de les sovenciones concedíes con esti sistema dende avientu del 2007, fecha en que s'abrió la investigación. El total de les ayudes a devolver tovía nun fuera cuantificáu por Bruxeles y el Gobiernu español.
Nes sos sentencies d'esti vienres, el Tribunal Xeneral anula los dos decisiones de la Comisión. El fallu señala que "la selectividá ye unu de los criterios acumulativos que dexen calificar una midida d'ayuda d'Estáu, y la Comisión nun demostró que'l réxime español fuera selectivu".
