El Gobiernu español aspira a llograr pa Cañete una "importante cartera económica" -como Comerciu o Mercáu Interior- y el presidente, Mariano Rajoy, salió "satisfechu" de la xunta que caltuvo'l sábadu con Juncker. Sicasí, el PSOE avisó de que l'ex ministru va tener difícil pasar l'esame de la Eurocámara poles sos declaraciones "machistes" na campaña pa les elecciones europees.

   Juncker empecipió'l martes la so ronda d'entrevistes con caún de los candidatos de los Estaos miembros, sacante la italiana Federica Mogherini, cola que yá s'axuntó'l pasáu sábadu enantes del so nomamientu como Alta Representante pa la Política Esterior. Hasta agora yá s'axuntó con una docena d'aspirantes.

   El propósitu d'estes entrevistes ye determinar la capacidá de los candidatos pa exercer como comisarios, según esplicó la Comisión. Al entrugar a los candidatos, Juncker va basase en particular nel artículu del Tratáu que dispón que "los miembros de la Comisión van ser escoyíos en razón de la so competencia xeneral y del so compromisu européu, d'ente personalidaes qu'ufierten plenes garantíes d'independencia".

   Los principales problemes a los que s'enfrenta Juncker a la hora de configurar el so equipu son, per un llau, Bélxica, qu'inda nun designó candidatu porque entá nun llogró formar Gobiernu dende les elecciones del 25 de mayu; y per otru l'escasu númberu de muyeres propuestes, pel momentu namás siete.

   La Eurocámara amenació con valtar la nueva Comisión si nun hai bastantes muyeres y Juncker comprometióse, en casu de que nun haya equilibriu de xéneru, a dar los cargos más importantes a les muyeres.

   Juncker prevé publicar la llista definitiva de comisarios, si Bélxica nun sigue retrasándose, a finales de selmana. Si esti calendariu se cumple, el repartu de carteres podría faese públicu a principios de la selmana que vien, probablemente'l 9 o 10 de setiembre, según fontes comunitaries.

   Una vegada repartíes les carteres, los futuros comisarios tienen que sometese a audiencies énte la Eurocámara ente finales de setiembre y principios d'ochobre. Si nun hai problemes, el Parlamentu tendrá que votar al colexu nel so conxuntu a mediaos d'ochobre pa qu'asuma les sos funciones el 1 de payares.