Baltasar Garzón ta acabante clausurar en Madrid un congresu de cuatro díes sobre la Xusticia Universal metanes d’un clamor escontra’l recorte n’España del principiu sobre’l que s’investigó a xenocides y criminales de lesa humanidá.

“Nun cierren los güeyos. Nun tenemos de vender la xusticia a cambiu de los intereses económicos d’un país”, instó la Premiu Nobel de la Paz iraní Shirin Ebadi al executivu español nel actu final del congresu “Xurisdición Universal nel sieglu XXI”.

Refería la ex xueza iraní a les amenaces de Xina ante la persecución por xenocidiu en Tíbet del so ex presidente Jiang Zemin y otros ex altos cargos del réximen que llevaron a la precipitada reforma exprés de la Xusticia Universal que’l PP impunxo nel parlamentu español cola so mayoría absoluta.

La nueva llei obliga en teoría al archivu de la decena de causes por lesa humanidá que tien abierta l’Audiencia Nacional española, al condicionar les investigaciones básicamente a los casos nos que tanto víctimes como presuntos criminales seyan españoles. Pero inda nun se peslló nenguna porque los xueces gárrense a les llagunes llegales que dexó una llei redactada aína ante les presiones diplomátiques de Pekín.

Garzón, qu’en 1998 abriera’l camín de les investigaciones sobre’l principiu de Xusticia Universal n’España cola orden de detención de Pinochet en Londres, consiguió estos díes convertir el congresu de la so fundación FIBGAR nun lobby escontra la reforma de la Xusticia Universal.

Na ceremonia de clausura de la cita, conducida pol actor arxentín Juan Diego Botto, la Premiu Nobel de la Paz Ebadi recordaba güei aquella xornada na que’l ex dictador chilenu yera arrestáu como “ún de los díes más felices” de la so vida. Anguañu, cola nueva norma, esa situación diba ser imposible.