Inundaciones, fuerte folaxe y caos pela ñeve: el temporal  qu’acomete en bien de fasteres d’Europa causó esti fin de selmana tres muertos n’Italia, pero tamién descomanaos daños en Serbia, Eslovenia, Austria, Suiza y el Norte d’España. Equí, nel norte y noroeste d’España, el fuerte folaxe derribó una muria de piedra na ciudá de San Sebastián y l’agua inundó l’hestóricu cascu urbanu, anegando locales, rules, comercios y una discoteca d’esta ciudá na riba del Cantábricu.

Les grandes foles –d’hasta siete metros según la previsión meteorolóxica- tamién afectaron a otros puntos de la costa norte d’España. Dañaron especialmente paseos marítimos y puertos pesqueros y deportivos de les rexones de Cantabria, Asturies y Galicia.

Los fuertes bastiazos provocaron inundaciones n’Italia, onde al menos tres persones, ente elles un neñu de siete años, morrieron na madrugada del domingu. Les víctimes mortales afayábensee nun vehículu cuando fueron arrastraes per una corriente d’agua na localidá siciliana de Noto. Otres cuatro persones, ente elles la madre del pequeñu, pudieron escapar de la corriente.

La cirria de ñev que cai dende va varios díes n’Eslovenia dexó ensin suministru elléctricu a unes 90 mil persones. La situación ye catastrófica, dixo la xefa de gobiernu eslovena, tres d’interrumpise’l suministru elléctricu y que los xeneradores quedaran destruyíos.

La ñeve y el xelu tamién causaron numberosos problemes en Suiza y Austria, anque la situación escomenzó a normalizase güei. El peligru de los ábanos ye en tola rexón mui altu y varies localidaes quedaron aisllaes, Les grandes cantidaes de ñeve acumulaes nos teyaos amenacen con facelos quebrar. N’Austria al menos un home morrió esta selmana nun ábanu.