La hermana del emir de Catar, Sheija Al Mayasa bint Hamad bin Jalifa Al Thani, fue designada esti xueves como la personalidá más influyente nel mundu del arte contemporaneu en 2013 pola revista inglesa Art Review. Según esta revista, la hermana del emir Tamim Ben Hamad Al Thani gasta cada añu n’arte, en calidá de responsable de l’Autoridá de museos de Catar (QMA), unos mil millones de dólares. Lo que vien a ser trenta veces más que lo qi’invirtiera en 2012 el muséu d’Arte Modernu de Nueva York (MoMa) y 175 veces más que la Tate Modern de Londres, dos de les instituciones d’arte contemporaneu más importantes del mundu.

QMA, qu’aspira a facer del riquísimu emiratu del Golfu un centru artísticu, causó sensación en 2012 comprando “Los xugadores de cartes”, del pintor francés Paul Cézanne, por 250 millones de dólares. Esti organismu, que xestiona varios museos en Catar, financió igualmente la última exposición del artista británicu contemporaneu Damien Hirst na Tate Modern de Londres, qu’atraxo cásique mediu millón d’espectadores.

Inda consagrando a la hermana del emir, Art Review fustiga a Catar por nun ser un réximen democráticu y por tar bien allonxáu de lo que podrían entendese como democracia. La revista recordó les recientes acusaciones d’explotación llaboral de los inmigrantes y les tres escultures griegues despíes que se negaron a amosar en Doha.