El viniente 10 de payares van cumplise 100 años de la primer grabación completa d’una obra clásica, la Quinta Sinfonía de Ludwig van Beethoven, que se realizó en Berlín. La grabación fue fecha en Berlín pola compañía Gramophone Company y la obra fue executada pola Orquesta Filarmónica de Berlín, la Berliner Philarmonoker, siendo director ún de los iconos de la dirección orquestal d’aquel tiempu, l’húngaru Arthur Nikisch.

Dende finales del sieglu XIX y principios del XX, formuláronse los principios teóricos de la grabación y reproducción del soníu. En 1977, el poeta y físicu francés Charles Cros presentó, ante l’Académie de Sciences, el principiu teóricu de grabación y reproducción del soníu mediante un aparatu qu’inventara, el Paleophone. Cros enxamás llegó a construyilu.

Por increyible que pareza, esi mesmu añu de 1877 el norteamericanu Thomas Alba Edison, ensin conocer siquiera al científicu francés, nel so llaboratoriu de Menlo Park entamó’l so proxectu pa una máquina, el Fonógrafu, curiosamente con fundamentu nel principiu nel que se basó l’aparatu de Cros qu’enxamás se construyera. Tres meses depués, el 6 d’avientu de 1877, el fonógrafu d’Edison tuvo yá construyíu y fue prebáu’l 22 d’avientu del mesmu mes. Naquella fecha realizóse entós la primer grabación de la hestoria.