Capturáu en Bariloche en 1994 y condenáu n’Italia a cadena perpetua como ún de los verdugos nazis de 335 italianos en Roma, en 1944, morrió n’arrestu domiciliariu de la so casa en Roma a los 100 años d’e3dá, Erich Priebke.

Priebke refuxárase na Arxentina cola famila poco depués de la segunda guerra mundial tres d’escapar d’un campu de concentración inglés. Radicó en Bariloche y ellí fue descubiertu  pa ser depués extraditáu a Italia.

Berlinés de nación, l’ex oficial nazi fue capitán de les SS alemanes y destináu a Italia nel añu 1943, onde participó na matanza de Las Ardeanitas. Esta masacre ocurrió’l 24 de marzu de 1944 y nella 335 italianos –na so más grande parte políticos recluyíos na cárcel de Regina Coeli y 75 xudíos escoyíos al azar- fueron fucilaos polos nazis. Tratóse d’una de les sos tradicionales represalies, nesti casu pola muerte de 33 soldaos alemanes nun atentáu cometíu’l día anterior polos rebeldes na Via Rasella, onde s’afayaba la sé romana de la Gestapo.

Los fusilamientos executáronse nes Fosas Ardeanitas, a 14 km al sur de Roma y la operación tuvo dirixida pol teniente coronel Herbert Kappler, xefe de la Gestapo en Roma durante la ocupación. Na matanza participaron el capitán de les SS Erich Priebke y el mayor Karl Hass.