La música que’l compositor Benjamin Britten compunxera pa emisiones radiofóniques durante la Segunda Guerra Mundial va interpretase pela vez primera en 70 años como parte de les cellebraciones pol centenariu del nacimientu del compositor británicu. La Orquesta Hallé de Manchester va tocar una d’eses composiciones nel Bridgewater Hall d’esa ciudá inglesa’l 3 d’ochobre, nun conciertu dirixíu por Mark Elder, qu’inclúi tamién Leningrad de Shostakovich, según s’indica nel programa.

El programa va abrise con Britten en tiempos de guerra, pa más lluéu presentar Muyeres en Gran Bretaña, una composición que l’inglés ficiera en 1942 pa la CBS estadounidense pa relatar l’aportación de les muyeres al esfuerzu bélicu. La pieza ye parte de la banda sonora que compunxo pa una serie documental de seis capítulos que narraba la vida nel Reinu Xuníu, Un americano en Inglaterra, qu’encargó la emisora americana en collaboración col Gabinete de Guerra del Gobiernu Británicu.

Britten, pacifista y obxetor de conciencia, emigró temporalmente a los USA durante la Segunda Guerra Mundial y, según los expertos, vio esta música como una aportación a la situación. El compositor eméritu de la Hallé, Colin Matthews, describió les pieces como “enllenes de color orquestal”.

En declaraciones a la cadena BBC, Matthews, que fuera ayudante de Britten y agora xestiona’l so llegáu, señala que “la habilidá d’él pa crear pieces memorables d’idees cencielles ye tan evidente equí como nes sos principales obres”. El compositor añade qure les composiciones pa radio, que fueron interpretaes nel so momentu pola orquesta de la Real Fuerza Aerea Británica, amuesen un estilu que xorrecía en Peter Gimes, la primer y más conocida ópera de Britten, estrenada en 1945.