Cuando Pablo Neruda muerre’l 23 de septiembre de 1973, amalapenes pasaran 12 díes del güelpe militar que derrocara al gobiernu socialista de Salvador Allande en Chile. Tolos actos públicos taben vedaos.

Poro, el féretru del poeta salió de la Clínica Santa María, en Santiago, cásique en secreto, arrodiáu pela so vilba, Matilde Urrutia, la hermana d’ésta, y una amiga de la pareya. Pero Pablo Neruda yera demasiáu popular pa dise solu. Amigos y vecinos fueron amestándose espontaneamente a la carroza fúnebre y los militares armaos que la custodiaben nun fueron quién a facer nada pa evitar que la multitú despidiera los restos del Premiu Nobel de Lliteratura, gritando consignes polítiques y cantando incluso La Internacional, l’himnu más famosu del movimientu obreru nel mundu.

Cuarenta años depués, cuando les razones exactes de la so muerte tan siendo investigaes depués de que’l xófer denunciara que fuera envelenáu y nun falleciera de cáncer como siempre se pensara y dixera, los medios de comunicación del mundu enteru tan divulgando testimonios de los testigos d’aquel hestóricu momentu, describiéndolu como estremecedor y desgarrador.

Asina fue’l testimoniu a la BBC d’Ana María Cabrioler: “Remembro que la xente salía a les ventanes a mirar. Nun dicía nada, pero notábase-yos el terror na cara, de ver que diba’l cortexu y delantre los militares armaos”. Ella y el so home caminaron tres del féretru gris de Neruda dende La Chascona, la casa del poeta en Santiago, allugada a los pies del cerru de San Cristóbal, hasta’l cementeriu.

L’entierru acabó siendo una catarsis collectiva. El fotógrafu chilenu Marcelo Montino ye l’autor de les imáxenes más emblemátiques del funeral de Neruda. Regresara a Chile en 1969, tres d’estudiar en Nueva York, y retrató de forma sistemática los turbulentos años que siguieron. Remembra Montecino: “De la qu’aporté al llugar yá había alredor de mil persones. Yera un día mui triste, mui nuble y había enforma ansiedá nel ambiente. Esperamos. Y, d’esmenu, entamó’l cortexu. Vendríen, qué se yo, otres mil persones. Y, a midida que los dos grupos se xuntaron, empezaron seliquino a cantar La Internacional. Fue desgarrador”.