Andecha Astur quier tresmitir el so esmolecimientu pol futuru de los asturcones qu’abelluga’l Monte Cayón (Piloña), tres la non renovación del conveniu ente l’Ayuntamientu Piloña y el "Principado" que-y permitió a l’Asociación de Criadores de Poni de Raza Asturcón (ACPRA), demientres los venticinco años caberos, la dimposición d’unes 120 hectáries de tarrén y l’aniciu d’una reserva xenética que güei cuenta con cuasique cuarenta exemplares. El determín del Ayuntamientu Piloña de, una vegá finalizáu'l conveniu, empobinar los tarrenos al aprovechamientu pela parte de los ganaderos de bovín de la fastera ye respetable, daes les condiciones que vien sofriendo’l sector dende cuantayá, pero dende Andecha atalantamos que nun se pue poner en pelligru’l futuru d’una raza autóctona que tantu costó recuperar y que tan venceyada ta al conceyu piloñés, onde tolos años se cellebra la Fiesta del Asturcón, na mayada d’Espineres del Puertu Sueve.

 Nesti sen, dende Andecha Astur criticamos a dambes alministraciones, Ayuntamientu y  "Principado", por nun facer un esfuerciu pa l'anoación del conveniu y por nun atender la propuesta d’ACPRA de siguir empobinando a los asturcones 30 de les 120 hectáries del tarrén, echando per tierra’l llabor fechu pola asociación nesti postrer cuartu de sieglu y qu’acabará, si naide nun-y pon igua, el prósimu 20 d’abril, al entamu la temporada de pastos. 

Casualmente, cuasique a la vegá que supimos del determín sobro la reserva d’asturcones del Monte Cayón, conocimos tamién los datos apurríos pol IV Inventariu Forestal del Ministeriu d’Agricultura, qu’espeyen un xabaz incrementu de los llanteros d’ocalitos n’Asturies fasta algamar el nivel que’l plan forestal asturianu contemplaba d’equí al añu 2053.

Hai que remembrar que’l Monte Cayón, aparte del so usu ganaderu, ta precisamente empobináu tamién al aprovechamientu forestal, tando na so mayor parte llantáu d’especies foriates como’l pinu y l’ocalitu. 

Poro, dende Andecha Astur queremos proponer una solución que vaiga en beneficiu de toles partes en conflictu: el compromisu d’enanchar los pastos pal ganáu bovín a costa de menguar la superficie de monte empobinada al aprovechamientu forestal. D’esta manera, podríen siguir conviviendo nel Monte Cayón vaques y asturcones.

foto: srt