El Conceyu de Cangas del Narcea, al traviés del Serviciu de Normalización L.lingüística, convoca la décima edición del Concursu’i cuentos curtios pa personas adultas. Nel concursu prémiase con 400 euros a la meyor obra escrita na categoría d’asturianu estándar ya con outros 400 euros a la más destacada n’asturianu occidental.

Puede participar cualisquier persona mayor de 16 años, presentando la súa obra orixinal, que ha tener cinco fueyas cumo mínimo ya venti a lo máximo, ha  ser anónima ya tar escrita a doble espaciu en formatu DIN A-4. El plazu pa presentar orixinales empicipia’l día 22 d’outubre ya acaba’l día 10 del mes muertu.

El xuráu del concursu vei tar formáu pola responsable del Serviciu de Normalización L.lingüística, por personal del Aria de Cultura del Conceyu Cangas, por un/a representante de la Rede de Normalización L.lingüística nos Conceyos ya por maestros/as ya escritores/as en l.lingua asturiana.

Los componentes del xuráu van xuntase a mediaos del mes muertu, ya ente esi mes ya’l siguiente darán a conocer el sou determín a los ganadores.

Los trabayos han presentase por cuatriplicáu anantias del día 10 del mes muertu no Serviciu de Normalización L.lingüística (La Plaza la Oliva, s/n, 33800, Cangas de Narcea), yá seya presencialmente ou por corréu certificáu na mesma dirección, nun sobre sin remite ou baxo pseudónimu, qu’axunte dientro la plica na que se dean a conocer los datos riales del autor/a.

Bases del X Concurso’i cuentos curtios n’asturianu pa personas adultas