Alberto Rodríguez, Pedro Durán, Masokhna Diop y Juana Marrón protagonicen una
serie escrita por Alberto Suárez, de la que s’ofrecen los tres primeros capítulos
Ámbitu ta estos díes d’estrena gracies a un proyectu audiovisual nuevu:
la comedia de situación Chatarrona. Responsable de les primeres temporaes de los programes
de TPA Camín de Cantares y Pieces, Ámbitu decidió, pal llanzamientu d’esti productu
de ficción n’asturianu, prescindir de los medios convencionales y estrenar esclusivamente
n’Internet al traviés del sitiu web chatarrona.com, onde, dende’l martes 13
d’avientu, yá se pueden ver los tres primeros capítulos –de diez minutos caún– d’esta
serie escrita y dirixida por Alberto Suárez y protagonizada por Masokhna Diop, Pedro
Durán, Juana Marrón y Alberto Rodríguez. Escoyendo esta canal de difusión, fácil
d’esparder al traviés de les redes sociales, la serie trata de llegar a asturianos auquiera
que vivan.
La producción de Chatarrona puede calificase de low cost, pos fíxose con un presupuestu
baxu pa lo que suelen costar esti tipu de productos audiovisuales, pero íntegramente
con profesionales –tanto na parte técnica como d’interpretación– que desarrollen
el so trabayu n’Asturies. Na escoyeta de los actores, optóse por combinar la esperiencia
de Pedro Durán y Alberto Rodríguez –bien conocíos pola so participación en programes
de TPA como Terapia de Grupo o El Chigre– cola frescura y solvencia de Juana
Marrón y el debú de Masokhna Diop, dos intérpretes que desenvuelven nesti trabayu
un repertoriu bien grande de rexistros espresivos.
Comedia social
Chatarrona ye una comedia gris, urbana y contemporánea, que cuenta la historia de
dos amigos nuna situación desesperada: Chuso (Alberto Rodríguez) y Esteban (Pedro
Durán) viven nun apartamentu propiedá de los padres de Chuso, que yá nun usen porque
compraron un pisu meyor. Al ser una vivienda de la familia, nun paguen renta, namás
los gastos, pero entrambos dos tán al paru y yá nun tienen derechu a prestaciones económiques,
asina que Chuso decide que la meyor manera de sacar perres ye poner un
anunciu pa garrar inquilinos que quieran compartir pisu y, de pasu, aprender un idioma,
l’asturianu. Un negociu basáu nos típicos programes internacionales, pero aplicáu
a Asturies.
Chuso ta mui ilusionáu pero Esteban ye mui escépticu col presuntu negociu. Esteban
ta mui deprimíu desque perdió’l trabayu, la vida regalada que llevaba como presentador
estrella de la tele, la fama y almiración de los telespectadores, y agora vive pendiente
d’una llamada de teléfonu del so axente que lu devuelva a los platós y a los prime time.
Por fin, l’anunciu de Chuso tien efectu y dos persones interesaes nel tratu lleguen a la
so casa y a les sos vides, Carolina (Juana Marrón) y Malik (Masokhna Diop).
Carolina, depués de rodar per media Europa, volvió a Asturies hai menos d’un añu y
quier aprender asturianu bien –un poco yá lo entiende, al ser fía d’asturiana– porque-y
parez bien triste dominar cuatro idiomes y nun facer lo mesmo cola llingua materna. Carolina
trabaya dende casa programando páxines web y tamién fai trabayos de manager.
Pero lo que más-y gusta a Carolina ye’l mundu del espectáculu, el teatru, poder llegar
a ser actriz. Malik tamién quier aprender asturianu –tamién sabe un poco porque trabaya
nuna sidrería–, pero quier sabelo bien porque quier optar a meyores oportunidaes
llaborales n’Asturies. Malik tien más hermanos viviendo n’Europa pero tien a so padre
y so madre en Senegal.
Les situaciones que viven estos cuatro personaxes fain de Chatarrona un retratu social
d’Asturies, onde rescamplen los contrastes que xenera la crisis económica. La serie xuega
con referencies a l’actualidá informativa, la historia de la llucha obrera nel país, los
ídolos deportivos nuevos o los conflictos sociales –como’l machismu o’l racismu– col
oxetivu d’esplotar un humor tan nuestro como único en mundu, al mesmu tiempu que
da una visión positiva del procesu de recuperación llingüística.
