N’acabando’l concursu de tonada, entama’l momentu de los comentarios y de les señaldaes. Los comentarios son siempre entendible. Les señaldaes, llega un momentu que cansen.

Señaldá ye cuando se diz: “Cantó mui bien Jorge Tuya; pero, como cantaba esa tonada Quin el Pescador, eso nun hai quién lo supere”. Lo que ye siempre falso por dos razones. La primera, porque Quin el Pescador ta mui bien como referencia, pero non como comparación. Y, la segunda, porque sintiendo bien la versión grabada de Quin el Pescador y l’actual de Jorge Tuya, salvando les distancies, nun concursu de tonada’l xuráu acabaría puntuando más la de Jorge que la de Quin.

Cola gaita, la señaldá falsa ye idéntica. Tando en Mieres, siguiendo’l Concursu Cuenca del Caudal, en La Nueva, detrás del Concursu de la Canción de les Mines, o nel Teatro Filarmónica col Concursu y Muestra del Folclor Ciudá d’Uviéu, con gaitareos acompañantes escelentes, los señaldoses apunten siempre a los mesmo: “¡Qué grandísimu yera Remis!” “¡Naide p’acompañar como Silvino!” “¡Onde tea la gaita de Panchu Galán!”

Estos son 10 gaiteros actuales acompañantes de tonada que bien poco tienen d’envidiar a los sos maestros. 10 gaiteros que sostienen riba’l so llombu los concursos de tonada y los festivales nos que participen. Porque, naide escaez que, demientres cada cantador de tonada interpreta dos o tres tonaes por festival o concursu, el gaiteru vien a salir por una media mínima de dos docenes de pieces.

Los 10 grandes gaiteros acompañantes de tonada del momentu, los más trabayaos en concursos y festivales, son los siguientes:

01 Vicente Prado “El Pravianu”.

02 Berto Varillas.

03 Pablo Carrera.

04 Belén Arboleya.

05 Valentín Fuente.

06 Óscar Fernández.

07 Alfonso Fernández “el de Les Regueres”

08 Kety García.

09 Fran Pola.

10 Iván Rionda.