Con enorme éxitu, presentóse en Pravia y en Mieres la zarzuela “El chaleco blanco”, al cargu de los cantantes y catores de l’asociación “Voces de Asturias”, dirixíos por Marta Martín Fano.

L’asociación “Voces de Asturies”, de reciente creación, ta acabante de poner en marcha esta iniciativa. El grupu tien una formación sólida, una gran dirección d’escena y cuenta cola participación d’una pianista de la categoría d’Olga Semushina. Al llevar tan poco tiempu en funcionamientu, tan abiertos a nueves voces a les que-yos preste’l xéneru.

La obra “El chaleco blanco”, nesta nueva versión, presentóse con motivu de les fiestes patronales de Pravia, el día 6 de septiembre, nel Auditoriu José Barreda. A finales de septiembre, la obra volvió representase nel Auditoriu Teodoro Cuesta de Mieres, ún de los escenarios teatrales más interesantes d’Asturies nesti momentu. L’éxitu acompañó les dos representaciones y animó enormemente a los responsables de l’asociación a programar nueves representaciones d’esta popular zarzuela.

“El chaleco blanco” ye un episodiu cómicu-llíricu nun actu, dividíu en dos cuadros y un intermediu, con música de Federico Chueca y llibretu de Miguel Ramos Carrión. Estrenárase’l 26 de xunu de 1890 nel Teatro Felipe de Madrid. Dende entós p’acá, vien siendo una de les zarzueles más representaes en toa España.

L’asociación “Voces de Asturias” ye una de les iniciatives más interesantes del panorama musical asturianu de’esti añu y la estrena de “El chaleco blanco” conviértelos nuna referencia dientro del xéneru.